Tengo mui bones alcordances del primer Baldur’s Gate. Non, bonísimes. Taba de xugar a rol en mesa, sobre manera a Dungeons & Dragons, y reconocía dafechu tou aquel mundu que me poníen delantre. Amás, ente’l mio grupu d’amigos siempre me tocaba a min ser el master, nun había manera de qu’otru deprendiera les regles, conque me prestaba pola vida poder ser xugador y interpretar un lladruepu de bon corazón, o quiciabes un paladín faltosu. La verdá nun recuerdo si xugué a la segunda parte, porque me pilló nuna etapa más difícil, pero agora, cola salida d’esti herederu cuando yá soi paisanu, nun podía quedame ensin prebalu. Namás llevo unes hores, ye verdá, pero yá pueo contar qué me ta paeciendo.
De mano, el diseñador de personaxes, que ye lo primero que t’alcuentres, resultóme un poco probe. Y ye que nun pues tocar muncho les habilidaes del personaxe (desconozo si ye que na quinta edición del xuegu de mesa ficiéronlo asina de simple, pero dúldolo) y tampoco los rasgos físicos como sí tamos avezaos n’otros xuegos de pol estilu. Per otru llau, paezme que gasten muncha enerxía en babayaes, como ye la posibilidá de combinar xéneros hasta de cuatro maneres distintes (pues escoyer, independientemente unos d’otros, la identidá, el cuerpu, la voz y los xenitales). Nun me paez mui lóxico, la verdá, tener más variedá de xenitales que pone-y al personaxe que cares distintes. Y, quitante eso, d’aspectu namás pues escoyer los colores. Gran parte de los anuncios y de la espectación del públicu son pola mor d’estes foscures, como cuando punxeron l’avance nel que’l personaxe tien sexu con un osu (supongo que sedrá un druida cambiaformes, anque eso nun-y quita la zoofilia), pero paezme que nun ye’l xéneru o pelo menos el títulu de videoxuegu pa centrase neses chancies más propies de primaria (por ser xenerosos). Tará bien pal públicu preadolescente, supongo, pero esi, pelo menos ensin permisu paternu, no teórico nun podría comprar el xuegu.
Entrando en megoyu, sí ye verdá que ye lo más paecío a un xuegu de rol que vi nunca, y con una hestoria interesante, qu’amás escuende munchos argumentos secundarios. Sobre la xugabilidá, nos momentos importantes siempre tienes de tirar el dadín, y rezar pa que te salga la puntuación suficiente porque’l resultáu va determinar tolo qu’asoceda dende entós p’alantre… Bono, pues cargar la partida si la cosa se tuerce muncho… pero ye feo, pienso, quíta-y muncha autenticidá. Sí ye verdá, como yá pasaba nel xuegu orixinal, que dacuando les reacciones de dellos personaxes son, o pelo menos resúltenmelo a min, desaxeraes pa la opción qu’escueyes. Recordaba aquello na primer entrega de que, si por casu te pillaben robando, de sópitu quería matate tola ciudá, y equí nun ye tanto pero sí paecío. Davezu, si dices una fras un poco fuera de tonu, nel intre alcuéntreste conque los interlocutores quieren matate y yá nun hai marcha atrás. Pienso qu’eso-y quita un poco de diversión, pelo menos pa los que tamos d’otros xuegos nos que tienes una llista de frases y, si lo que t’interesa ye averiguar tresfondu de la hestoria, lo que faes ye gastales toes una a una pa consiguir la mayor información posible. Nun sé, xugar con mieu a estropiar una misión por dar a la llinia equivocada pue resultar estimulante a dalgún, pero ye como quien esfruta morriendo milenta vegaes nel Dark Souls. A min nun me va muncho.
Sobre les posibilidaes de ramificación y la rexugabilidá, de momentu pueo dicir que tien pinta de ser tremenda. Aquelles vegaes que morrí y tuvi de refacer les coses, o (almítolo) una que cargué porque les coses se torcieron demasiao como pa que pudiera siguir divirtiéndome, les coses pasaron de manera distinta por salir un resultáu distintu nes tiraes pasives, o namás por nun pasar exactamente pel mesmu sitiu. Alcontré coses por pura suerte y de xuru qu’otres me pasaron inalvertíes, conque ye probable que nuna segunda partida esfrute de coses que me resulten dafechu nueves.
En resultancia, tengo la impresión de que cuando lu acabe voi afirmar que ye un xuegu tremendu, pero eso nun quita que pierda por dexase llevar por modes y dél sensacionalismu.
Por si nun lu vistis tovía, déxovos un avance equí.
