Va dos díes que salió a la venta, pero Baldur’s Gate III ye yá’l segundu xuegu con más ésitu de 2023, namás per detrás de Hogwarts Legacy. Y ye que, polo que tán reseñando los primeros xugadores, nun ye solo un bon herederu de la saga clásica (recordemos que yá tien llovío dende’l primeru y el segundu, que salieron respeutivamente en 1998 y 2000), sinón que va acullá y tienen tantes posibilidaes de xuegu que tán aturullando a la xente, resultando lo más asemeyao nunca habío en videoxuegu a una partida real de rol. Cuenten que cada aición tien un efeutu nel mundu, llegando a producir reaiciones en cadena, y el resultáu de la partida pue depender d’un detalle pequeñu o de la escoyeta ficimos nun principiu de raza, clas o habilidaes del personaxe. Inclusive hai xugadores que, con orixinalidá, tán descubriendo poder facer coses que probablemente nin se-yos ocurrió a los diseñadores, como esti que decidió asediar un castiellu apilando una caxa enriba d’otra hasta resalvar la muralla. Con tan pocu tiempu de vida, yá se convirtió nun referente no tocantes a xuegos de rol.
Sobre los combates, tenemos dalgo que recuerda a los videoxuegos anteriores, aquel momentu de calcar al pause pa dicir a cada personaxe qué facer, y que de xuru recordáis los que xugastis a los xuegos orixinales. Y ye que, agora, siempre tenemos disponible la opción d’engarrianos en tiempu real o a turnos, según como nos pete, lo que sedría una bona actualización d’aquel sistema.
Hai otru componente, bastante chanciosu y que nun podemos dexar de comentar, pos ye lo que más ésitu ta teniendo nes plataformes de streaming: el xuegu tien esnudos, y podemos diseñar los xenitales del nuesu personaxe cuando lu creamos. La reaición de los xugadores al descubrilo ye bien simpática, como podemos ver equí, equí o nesti clip bastante más… sorprendente. Tamién esiste la posibilidá de tener rellaciones sexuales ente especies distintes, como nesi vidéu nel que se ve a un paisanu facelu con un osu. Maneres de llamar l’atención pa facer publicidá colo más llamadero, lo más seguro, pero nun por ellos hemos de poner menos atención na calidá del videoxuegu.
Sicasí, l’avance del videoxuegu que ye daveres importante ye esti, onde podemos ver lo valioso del xuegu y non les tontaes.
