En cuantes que los drechos del famosu osu, Winnie the Pooh, pasaron a ser de dominiu públicu, el direutor de películes de serie Z, Rhys Frake-Waterfield, vio nello un filón por esplotar. Asina, ñació l’acabante d’estrenar Winnie the Pooh: Blood and honey, na que Winnie y Piglet (el gochín) allorien cuando Christopher Robin los abandona, y empiecen a matar inocentes talamente como los peores asesinos d’una película slasher (si queréis podéis ver l’avance calcando equí). Y magar les amenaces de muerte que llegaron a dellos miembros del equipu, la película asoleyóse yá en dellos países y ta siendo tou un ésitu, d’una manera que recuerda un poco al fenómenu de la saga Sharknado polo disparatao. De fechu, la gran receición yá animó al direutor y la productora de forma tala qu’adelantren qu’hai una segunda parte en camín, y que quieren crear a partir d’ella tou un universu cinematográficu.
El que paez que va ser el segundu proyeutu d’esti universu ye Bambi: The Reckoning, con una versión del personaxe que va xurar vengase de la humanidá tres de la muerte de so ma. El direutor, Scott Jeffrey, tien nel currículu títulos tan suxerentes como Cannibal Troll o The Curse of Humpty Dumpty. Otru de los proyeutos sedría Peter Pan’s Neverland Nightmare, de la que yá dexaron cayer que la fadina Tinker Bell va ser obesa y drogadicta. Y tamién tán pensando nuna version asesina d’El Grinch, de la que tovía nun sabemos más.
Toos estos personaxes van convivir nel mesmu mundu, al estilu de los del Universu Cinematográficu Marvel, pa dempués poder cruciar unos con otros y enfrentalos. ¿Nun ye una maraviya?
