Nun sé si Barbarian ye horror “eleváu”, esi axetivu que se pon agora a bona parte del cine mieu pa dicir qu’eses películes sí que se puen tomar en serio. Paezme una etiqueta qu’en verdá nun sirve pa nada, pos trata de dignificar un xéneru que nun necesita dignificación dala… talamente como al dicir “novela gráfica” (o, yá lo más esperpéntico, “novela” a seques nos creitos de ¡García!) pa les hestorietes de tola vida. Y aquelles películes que clasifiquen como “horror eleváu” tampoco nun ye que precisamente m’apasionen, sacante dalguna qu’otra cosa suelta. Pero paezme mui probable que Barbarian tea clasificada, o pronto clasifiquen,, como una d’estes películes que tienen el vistu bonu de los críticos gafapastia, y, la verdá, prestóme abondo.
Lo único que podemos dicir del argumentu, pa nun chafar sorpreses, ye qu’empieza con una moza que viaxa a Detroit pa una entrevista de trabayu, y que, cuando llega a la casa qu’alquiló, atopa nella a otru mozu que, paez ser, dalgún error informáticu permitió-y alquilala tamién. A partir d’ehí empieza lo imprevisible, y contar cualesquier otra cosa ye desvelar por demás de la película. Esta riestra d’asocedíos inesperaos, rompiendo moldos de contino (anque, nun nos vamos engañar, nun hai moldu que nun se tenga roto yá) ye parte de lo que, pienso, fai la película interesante pa los críticos, el cómo xuega colos tópicos y la narrativa basándose nun arcu d’influyencies que van dende Hitchcock a Tarantino, y pa mio idea tamién hasta con dalgún toque de Rob Zombie. Tamién podemos atopar un usu intelixente de la cámara, que, ensin llamar l’atención faciendo coses perestravagantes, sí ye a calcar en ciertes sensaciones con planos y téuniques non dafechu convencionales. Y arriendes de too ello, tenemos un argumentu con ciertu tresfondu políticu, tanto pola ambientacion nun barriu a les afueres de Detroit, antaño acomodáu y agora un espantu en ruines pola mor de la desindustrialización, como por tocar de pasada ciertes custiones d’actualidá como pue ser el MeToo.
En resultancia, una película mui recomendable, qu’arreciende a nuevo masque basada en milenta coses anteriores, y que yá podéis esfrutar en Disney +.
