Cuando s’estrenaron Barbie y Openheimer hubo munches bromes sobre dir a ver les dos películes en doble sesión, yá que’l contraste de tonu ente les películes yera bultable. Hasta Tom Cruise, que naquella taba compitiendo en cines cola versión nueva de Mission: Impossible, apuntóse a facer la chancia. Mentanto, l’auxe de los xeneradores d’imáxenes por intelixencia artificial afalaron a la xente a enllenar les redes de memes nos que fusionaben les dos películes y fungos atómicos de color rosa.
El casu ye qu’agora la broma va facese realidá, pos la productora de películes de serie B, Full Moon, tuvo áxil y anuncia que ta produciendo la película Barbenheimer, una parodia que va facer un mecigayu de les trames de les dos películes. Nella, la doctora Bambi J. Barbenheimer, una moñeca científica de Dolltopia, ta farta del tratu que-y dan los ñeños a los xuguetes, y por ello decide construyir una gran bomba nuclear pa destruyir el mundu real.
Tovía nun sabemos qué actores va protagonizala nin quién va dirixila, pero sí que yá tienen el guión fechu. Por supuestu, ye una película de presupuestu baxu (menos d’un millón d’euros), y nun podemos esperar grandes estrelles a nun ser que seyan xuguetes rotos (nunca meyor dicho). Amás, puesto que la productora Full Moon ye conocida, sobre manera, pola saga d’horror Puppet Master, nun podemos escartar que la doctora Barbenheimer seya daveres una moñeca, movida por stop motion.
Por si esta llocura fuera poco, paez ser que la productora tamién tien ente manes merchandising de la película, ente’l que s’alcontraría una moñeca de Barbenheimer de la que tovía nun hai diseñu final, pero que “de xuru va tener una bomba atómica xigante”.
Si esta fusión estrambólica de películes tuviera ésitu, el recursu podría amestase a otres modes lloques que tán surdiendo y de les que vos tenemos falao equí, como la de películes d’animales drogaos qu’empezó Cocaine Bear, o la de les versiones d’horror d’hestories pa ñeños, como Winnie the Pooh: Blood and Honey (y de la que yá van estrenar una segunda parte).
