La estrena simultánea de dos películes tan distintes como comedia fantástica Barbie, de Greta Gerwig, y el drama basáu en fechos reales Oppenheimer, de Christopher Nolan, produxo una fiebre “memética” en redes, na que’l gran contraste de tonu ente les dos obres yera la base de los chistes. La cosa espoxigó cuando Tom Cruise sacó una semeya con entrada a les dos películes, y pronto tomó tales proporciones que yá hasta se vienden abondes camisetes qu’aprovechen l’amiestu (como esta d’equí, o esta otra). Los propios actores de les películes, y hasta les productores, apuntáronse a ello como campaña publicitaria, pero col pasu de los díes abulta que nun foi tan bona idea como podía paecer de mano.
Y ye que, como dicíemos y yá sabríeis, Oppenheimer ta basada na vida del creador de les bombes atómiques, eses mesmes que tiraron sobre Hiroshima y Nagasaki. Calcúlase que sumando les víctimes de dambos dos bombardeos morrieron unes doscientes cincuenta mil persones, los más d’ellos ciudadanos que nada teníen que ver cola guerra. Y, como ye normal, en Xapón nun ta prestando nada que se faiga chancia d’ello. Asina, #NoBarbenheimer lleva unos díes siendo tendencia nel País del Sol Naciente. Ye por esto que Warner Bros s’acaba de ver obligada a disculpase tres de que la so filial en Xapón criticara les cuentes norteamericanes en redes sociales:
“Consideramos llamentable n’estremo que la cuenta oficial de la sede norteamericana de la película Barbie reaicionara a les publicaciones en redes sociales de los fans de Barbenheimer. (…) Tomamos esta situación mui en serio. Tamos pidiendo a la sede de los EE.UU. que tome les midíes apropiaes. Pidimos disculpes a los que se sintieron ofendíos por esta serie de reaiciones desconsideraes.”
La rempuesta, anque curtia, ye clara al respeutive: “Warner Brothers llamenta la recién participación insensible en redes sociales. L’estudiu ufre una disculpa sincera”.
A estes, Oppenheimer nun s’estrenó en Xapón y tampoco nun s’espera, pos nun anunciaron fecha dala pa ello.
