El ventiocho de marzu sal a la venta la película d’animación Batman: The Doom That Came to Gotham, basada nel cómic homónimu de Mike Mignola (creador de Hellboy) y del que’l títulu fai homenaxe al rellatu de Lovecraft The Doom That Came to Sarnath.
El cómic orixinal, asoleyáu ente l’añu 2000 y el 2001, pertenez a la llinia Elseworlds, na que presenten a los personaxes de DC allugaos n’otros tiempos o llugares mui distintos, contándonos hestories d’ellos fuera de la continuidá del Universu DC. Batman ye’l personaxe que más cómics d’esti tipu tien protagonizao, desque s’estrenó la llinia con un alcuentru ente esti y el mesmísimu Drácula.
La hestoria orixinal del cómic ponnos nuna Gotham especiamente espantible, nel añu 1928, onde’l Caballeru Escuru ha enfrentase a los sos típicos enemigos pero dándo-yos una vuelta pa tornalos creatures lovecraftines. La hestoria de la película abulta tener diferencies significatives tocante al cómic, pero sí caltener la mesma esencia. A Batman pon-y voz David Giuntoli, actor conocíu por protagonizar la serie Grimm, lo que resulta bastante apropiáu pa la temática.
Yá hai un avance d’ella, y podéis velu calcando equí.