Va poco más d’un añu llegónos la noticia de que Miura Kentarō, l’autor xaponés conocíu (sobre manera) pol manga de fantasía escura Berserk, morría con namás cincuenta y cuatro años a causa d’una disección aórtica aguda, emerxencia médica de la que se tien demostrao l rellación col estrés. Y ye que l’autor llevaba trés décades dexando cayer nicios del tipu de vida que llevaba pa entregar les páxines en tiempu: coses como “diome una fiebre de cuarenta graos; pensándolo bien, namás tuvi dos díes de posa esti añu”, “desque mudé, sigo dormiendo menos de cuatro hores”, “de díes llibres tengo mediu cada dos meses”, “volví a amoriar pol trabayu”… son solo unos pocos de los que muestren lo díficil que foi la vida del mangaka. Y ye que si axuntes los plazos de les revistes (Berserk publicábase en Young Animal primero de salir en tomos) cola disciplina y autoesplotación tan propies de la cultura xaponesa, sal un cóctel de lo más dañible.
La cosa nun va meyor si amiestes les quexes de los aficionaos. N’Occidente igual nun ye pa tanto, pos al cabu y al cantu ehí ta G. R. R. Martin pasando de los llectores que-y piden, davezu de manera non mui amigable, que saque la última parte d’A Song of Ice and Fire, y nun paez qu’él-yos faiga munchu casu. Hasta diría que yá nun lu saca por amolar. Por embargu, nun paez mui prudente, nin siquiera en casu de tener en cuenta namás intereses egoístes, siguir faciendo lo mesmo colos autores xaponeses. Y ye qu’agora nun son pocos los que reclamen entainar a Oda Eiichirō, autor dende 1997 de los yá cientu cinco volúmenes del esitosu manga de pirates One Piece. Y ye que, tando yá la hestoria cerca de la conclusión, los llectores tan volviéndose de lo más faltoso esixendo nes redes. Oda tien dicho que nun duerme la metá de les nueches porque trabaya de siguío de la mañana d’ún hasta acabar l’otru, o que dacuando nun come pa evitar que-y entre galbana. Son los propios editores los que dalguna vegada yá lu afalaron a tomar les coses con más calma, y él tien bastante cabeza como pa face-yos casu. Pero, mientres, los aficionaos quéxense en redes porque l’autor va tomar unes vacaciones d’un mes tres del capítulu 1086 (esto ye del doce de xunu al diez de xunetu), porque polo que se ve nun puen aguantase un poco pa saber qué va pasar nel 1087.
