La película de salió en Netflix va unos meses, Mighty Morphin Power Rangers: Once & Always, paecía prometer una vuelta de personaxes y argumentos ñacíos nes primeres temporaes de la mítica serie. Pos dicho y fecho. La serie nueva de la franquicia, Power Rangers Cosmic Fury, va siguir ehí onde lo dexó la película.
Como pudistis ver nel especial (o, si non, contémosvoslo equí), nesta hestoria los Rangers orixinales (bono, y dalgún non tan orixinal) teníen d’enfrentase a Rita de nueves. Nesta batalla tomó un papel especialmente relevante Billy, el Ranger Azul orixinal y xeniu científicu, al qu’agora, yá paisanu, nos presenten como una especie de Tony Stark con una empresa d’alta teunoloxía. Tamién nos presentaben a Minh Kwan, la fía de la Ranger Mariella orixinal, yá que l’argumentu foi en gran midida un homenaxe a l’actriz finada.
Pos bien, na serie nueva de Power Rangers ,que, como tolos años desque empezó nos noventa, garra cuasi toles imáxenes d’aición de la franquicia xaponesa Super Sentai (nesti casu de la serie Uchu Sentai Kyuranger) va retomar estos dos personaxes ehí onde quedaron, siendo Billy el mentor de la xeneración nueva y con Minh nun papel secundariu, lo menos de momentu ensin garrar traxe propiu.
Esta serie, amás, sigue tamién coles trames y los personaxes de Power Rangers Dino Fury (l’anterior de la saga), funcionando tamién asina como una segunda temporada d’esta. Pero cola novedá, bien llamadera, de que los Rangers van tener que parar los planes de Lord Zedd, el gran villanu de la serie clásica (y de los pocos monstruos creaos escluivamente pa la versión norteamericana). Esti escapó d’ellí onde tuviera enzarráu, y ye por ello que los héroes han buscar poderes y zords nuevos, siéndo-yos imposible vencelu colos que poseyíen.
D’esta manera, y anque nunca dexó de facer dellos chisgos a les temporaes pasaes, queda claro que desque Power Rangers ta en Netflix quier garrar un sentíu de la continuidá más fuerte, tirando de señardá y venceyando temporaes pa uniral empar delles xeneraciones d’espectadores nun universu más ellaboráu.
La serie estrénase’l ventinueve de setiembre, pero yá tenemos accesu a la versión nueva de la típica abertura de la serie. Pues vela calcando equí.
