Como yá vos venimos contando, los universos superheroicos que se tienen construyío y sobreesplotao estos últimos venti años paecen alcontrase nuna crisis importante. Los fracasos tán siendo sonaos, llamando sobre manera’l de DC con Blue Beetle, pero les previsiones anuncien que’l de The Marvels va ser tovía mayor si nun asocede un milagru (tien un 72% menos de preventa qu’Ant-Man and the Wasp: Quantumania, y habría tener bastante más ésitu qu’esta pa nun producir perdes). Como yá sabéis, la película Batgirl de DC quedó borrada de la historia cuando yá taba fecha porque pensaron que nun pagaba la pena gastar dineru nin en publicidá, y como vos contábemos l’otru día (equí), la serie nueva del superhéroe ciegu, Daredevil: Born Again, gusta tan poco en Marvel qu’acaben de mandar refacela.
Güei tenemos más males noticies, si ye que sois fans de Marvel, y ye que, según paez (tovía nun ta confirmao, pero toles informaciones apunten a ello), nel recorte de programación de Disney+ que se ta faciendo pa nun sobreesplotar les franquicies más importantes nin gastar perres de más (Secret Invasion costó doscientos millones de dólares, y nun foi mui esitosa), tendríemos una baxa importante. La serie dedicada a Wonder Man, el vengador iónicu al que diba encarnar Yahya Abdul-Mateen II (el nuevu Candyman), taría yá, según dellos portales, fuera de los planes de los estudios. Y eso que que yera una producción que taba bastante avanzada.
Per otru llau, agora sábese dalgo sobre’l despidu de Victoria Alonso, vicepresidenta de Marvel Studios, y qu’hasta va nada yera un rumor: Según el llibru MCU: The Reign of Marvel Studios, de la escritora y podcaster Joanna Robinson, esti taría causáu porque Alonso criticó a Bob Chapek, ex-director executivu de Marvel, por nun oponese al proyectu de llei de Florida conocíu como Don’t Say Gay. Y amestándose esto a que nun quixo quitar dellos símbolos LGTBQIA+ de la película Ant-Man and the Wasp: Quantumania pa poder estrenala en dellos países (cosa que se fizo de toles maneres), Kevin Feige aprovechó que la directiva produxo p’Amazon Argentina, 1985 y usó pa echala la cláusula del contratu que nun-y permitía trabayar con otres compañes.
