Nunca nun espero demasiao de les películes de superhéroes, porque yá teo deprendío qu’eso namás que pue llevame a la deceición. Protagonizando esta The Rock, que ye mui de facer coses que se puen ver, anque tamién escaecer con facilidá, pensé que pelo menos pasaría un ratu entreteníu. Y cuála la sorpresa cuando al poco d’empezala pensé que m’alcontraba ente un productu superior a la media, porque atopé nél idees que m’encantaron. Ye una pena que la ilusión nun durara muncho, pos a partir d’entós foi testigu de cómo se diben desaprovechando.
Empezamos con un flashback que nos lleva al orixe del personaxe, allá cuando la humanidá yera nueva y acaba d’echar arriba les primeres civilizaciones. Nun mecigayu estupendu, d’esos tan propios del mundu los superhéroes nos que nun sabes si tas énte una obra de fantasía o de ciencia ficción, preséntente Kahndaq, el país ficticiu del que ye Teth Adam, pa darréu dar un saltu al presente. El conceutu a partir del que construyen l’ambientación paezme pimpanudu: un país primíu d’Oriente Próximu, aparentemente xenéricu, pero nel que, ente ruines escomanaes y la promesa d’un mesíes, tamién alcontramos una ciudá de corte futurista, quiciabes propia de Neill Blomkamp, y que ta tomada por unos mercenarios que, por etnia y nome, dase a entender qu’actúen al serviciu d’Occidente. Pa mio idea ye una cosa potentísima, pos da aires a una Wakanda árabe de reminiscencies bíbliques y estética cyberpunk, que yá por sí mesma da pa una hestoria ensin necesidá dala de superhéroes.
Darréu, espierta’l protagonista, que lleva dormíu unos cuantos milenios, y ponse a repartir tortes como si nun hubiera mañana. Y anque la película nun ye sangrina, nin tien un tonu siniestru, queda claro que’l personaxe nun ye un héroe al usu, y nun tien problema nengún n’acabar colos mercenarios foriatos a base de fatalities de Mortal Kombat. Y esto amás nun ye, como sí asocedió n’otres llicencies de DC llevaes al cine o televisión, qu’escaezan el componente moral pa facer al personaxe más gallu, sinón que’l personaxe ye asina de bastu yá nes hestories orixinales.
Y yá, l’últimu componente que m’encantó son los efeutos pa los miembros del equipu de superhéroes que se-y enfrenta, la Sociedá de la Xusticia. Pierce Brosnan fai de Doctor Fate, el que se suel definir como’l Doctor Strange de DC anque tenga munchos más años, y pónen-y unes traces y unos poderes d’estética estraterrestre (talamente como ye l’orixe del yelmu que lleva) ensin pecar tampoco de mieu por tener d’estremalu de Strange pa que los non-iniciaos nun los critiquen por copiones. Los poderes de Cyclone tienen tamién un aspeutu únicu, dándo-y un coloríu que queda guapísimo y ensin lo que paecería una Storm d’Hacendado.
Llamentablemente, ehí ye cuando acaba tolo que me paez estupendo, porque nel intre la película conviértese nun baruyu de golpes nel que lo único que tienes claro ye que t’apetez qu’acabe. Pueque seya por tener un protagonista tan poco humanu, ensin llazos con amigos y familiares como tendría ún con identidá secreta. Quiciabes porque cuando espierta failo ente tiros y esplosiones y la cosa nun va más a lo fondero. O igual pola manía de qu’una superproducción ha durar por obligación lo menos dos hores. Pero nun pueo dexar de pensar qu’ehí había unes idees tremendes, y daqué ayeno a elles fízome quitar la película enantes inclusive de que terminara. Lleí qu’hai una escena poscreitos na que sal Cavill volviendo como Superman con una estética más reevesina, y nin siquiera m’apeteció da-y p’alantre.
