N’otros artículos yá faláramos del fenómenu y del puxu del k-pop en xeneral, pero güei tócanos falar del que quiciabes (y ensin el quiciabes) ye’l grupu de k-pop femenín más conocíu a nivel mundial y que cada vez ta algamando más y más ésitu a nivel mundial: Blackpink.
Blackpink ye un grupu formáu por cuatro moces: Jisoo, Jennie, Rose y Lisa. Les tres primeres son d’orixe coreanu (pero tanto Jennie como Rose tuvieron dellos años viviendo fuera de Corea del Sur), mientres que Lisa ye tailandesa. Tienen algamaos una montonera de récords en Youtube y dellos vídeos musicales d’esti grupu algamen más de mil millones de reproducciones. Amás, tienen collaborao con delles artistes d’otros países, como son Dua Lipa, Lady Gaga o Selena Gómez.
Esti grupu debuta, ye dicir, saca la so primer canción, en 2016, col títulu “Whistle”, y que formaba parte de un álbum más pequeñu tituláu Square One, nel que tamién taba otra de les canciones más conocíes que tien: “Bombayah”.
Pero’l debut nun ye namái que’l resultáu de dellos años de trabayu y esfuerzu, consistentes na formación y entrenu nuna de les academies de YG Entertaiment. Pa que vos faigáis una idea, esta compañía fai audiciones non solo en Corea, sinón n’otros países, ufriendo contratos de formación a los que pasen les prebes, y estes cuatro moces tuvieron de pasar estes audiciones (y dafechu la única que la fizo en Corea foi Jisoo). El grupu foi formáu pola compañía, y dafechu d’entamu diba tener más moces. Sicasí, Lisa y Rose yeren amigues d’enantes de ser parte del grupu.
Ún de los techos que frañaron nel caberu añu foi’l ser parte de los grupos qu’actuaron na Coachella Valey Music en 2019, siendo’l primer grupu coreanu qu’actuó ellí. Amás, nos últimos años tamién ficieron una xira mundial, y dafechu, una de les ciudaes nes qu’actuaron foi en Barcelona.
Trunfar nuna industria que furrula sobremanera en base a grupos fechos y entrenaos nes compañíes dempués d’un montón de selecciones ye difícil, y entá tovía más llegar a ser el grupu más conocíu. Una de les razones pola que probablemente Blackpink destacara ente los demás grupos ye que caúna delles tien una personalidá única, espoxigada en que caúna vienen d’unes vivencies y esperiencies abondo distintes. Sicasí, esto foi una torga importante, porque la llingua materna de Lisa ye’l tailandés y Rosé, magar que ye coreana, creció falando n’inglés. Anguaño toes falen ensin problemes coreanu y una montonera de llingües más.
Magar too esto, estes moces siguen siendo persones normales, colos pies na tierra, que saben que’l ésitu va y vien y que nun son a creer tolo que tan algamando. Podéis conoceles más nel documental BlackPink: Light up in the sky qu’asoleyó d’elles Netflix.
Ye bastante habitual que los y les idols del k-pop tamién sían la imaxe de marques perconocíes como elementu publicitariu (lo mesmo qu’equí). Sicasí, Lisa, por ser tailandesa, atopó delles torgues con dalgunes d’estes marques, coles d’orixe coreanu, porque nun la quixeron como imaxe por ser estranxera. Esti fechu fizo que se desendolcaren campañes pa torgar a eses compañíes por considerar que lo que taben teniendo yera un comportamientu racista. D’otra miente, el fechu de que Lisa nun ye coreana, fizo qu’algamara delles campañes que les compañeres non.
Tamién tienen dalgunos trabayos en solitario, como ye’l casu de la canción Solo de Jennie o On the groud de Rose. Amás, tamién ta planiao que Lisa y Jisoo saquen canciones en solitario, que de xuru que tamién van tener una bona acoyida.
Y agora solo queda recomendavos escuchar delles canciones d’estes moces, anque hai que dicir que paez que nun tienen nenguna que sía mala y qu’entemecen munchos estilos. Bombayah, Lovesick girls o Kill this love son dalgunes de les que más presten escuchar. Tamién podéis escuchar As if it’s your last, que por cierto, el so videu musical apaez na Lliga de la xusticia nuna de les pantalles del esconderite de Flash.
