Como llevamos tiempu dándovos cuenta d’ello, la fuelga de guionistes norteamericanos ta poniendo pates p’arriba la industria hollywoodiense, y yá empiecen a ser vezu les noticies sobre atrasos o direutamente parones hasta nuevu avisu.
Nesti casu hemos contavos que, per un llau, Deadpool 3 alcuéntrase énte un problema, que nun impide la so grabación pero sí-y pon una torga importante. Y ye que, yá que Ryan Reynolds ye de manera oficial ún de los guionistes de la película, arriendes de protagonista, nun pue, en tanto que miembru de la WGA (el gremiu de guionistes d’América) improvisar nin siquiera una llinia del diálogu. Con esta torga, el resultáu final de la producción pue sufrir abondo, yá que Reynolds tien esperiencia y vezu de facer esti tipu de cambios d’última hora pa tentar d’ameyorar les escenes. Y anque tovía queda bastante pa que Deadpool 3 s’estrene (ta datada pa payares de 2024) y siempre sedría posible que se llegara a un alcuerdu colos guionistes, la cosa pinta bastante mal porque la posproducción de les películes de superhéroes suel ser bien llarga, pola mor de tolos efeutos especiales que tienen de pone-yos.
Per otru llau, va tiempu que se fala de Blade Runner 2099, una serie de televisión producida por Amazon Prime a la xunta de Ridley Scott, y que siguiría cola hestoria basada (dalgo, pero non muncho) na novela de Phillip K. Dick Do Androids Dream of Electric Sheep?. Tienen prometío que va ser una serie al altor de les grandes superproducciones de les cadenes de streaming como la de la mesma cadena The Rings of Power, y d’ella sabemos (evidentemente, pol títulu) que trescurriría cincuenta años depués de la segunda y postrer película de Blade Runner, pero mui poco más. El casu ye que, tando a puntu de que l’equipu enteru se treslladara a Belfast pa principiar el rodaxe, agora queda paráu hasta, calculen, primavera de 2024, que yera cuando pensaben estrenala nun empiezu.
Y asina, sigue la riestra de series y películes afeutaes pola fuelga, amestándose estes a otres como la última temporada de Stranger Things o la próxima Thunderbolts de Universu Cinematográficu Marvel.
