Toles persones que siguen un poco les novedaes editoriales de la lliteratura asturiana saben que Blanca Fernández ye la novelista más moza de les lletres asturianes; lo que mui poca xente sabe ye que, amás, probablemente seya la de mayor producción. En 2021 asoleyó con Ediciones Radagast la so primer novela curtia “L’home les caparines” que sorprendió a toos escosando la so primer edición en namás dos meses y que se pue mercar calcando equí. Esi añu, tamién, ganó’l Primer Premiu Radagast de Fantasía, Ciencia Ficción y Terror cola novela “Trovadoresca” que verá la lluz a mediaos de 2022 y agora, xusto primero de qu’acabe l’añu, acaba de ganar la primer edición del Enriqueta González Rubín de narrativa moza, con otra novela (yá la tercera) “No que cinca los seres de lleenda”.
Entamemos pel principiu de too: Lleves más de 10 años escribiendo y en 2021 saques una novela y ganes dos premios, too el mesmu añu: ¿Alliniáronse los astros?
Pues podría dicise que sí, porque la realidá ye que les tres llevaben demasiáu tiempu entamaes o plantegaes. La verdá que “No que cinca los seres de lleenda” foi la primera qu’empecé va diez años pero quedó atapacida nel caxón hasta’l añu pasáu; la primer versión de “Trovadoresca” foi de 2019 y L’home les caparines tamién tuvo nel caxón hasta que la finé na cuarentena. Amás, les tres coinciden nel fechu nel que son segunda versión caúna d’otru manuscritu (entamo a pensar que tengo un problema).
¿Qué va atopar el llector en “No que cinca los seres de lleenda”?
Pues ye complicao, porque va atopar munches coses, entamando por una historia dientro d’otra. El/la protagonista, Ale, nun s’identifica en tola historia con nengún xéneru y “No que cinca los seres de lleenda” ye’l cuadernu manuscritu que-y dexa cuando va cumplir 12 años, cinco años dempués de desapaecer. Como bien diz, ye la historia de la so familia y de la so infancia n’Entrialgo, pero ye una historia venceyada a la mitoloxía y a creyer no fantástico y más allá de lo considerao racional. En tres partes cunta-y lo qu’él deprendió al empar del güelu y tolo que vivió nesi pueblu y nos de cerca.
Que seya n’Entrialgo nun ye casual, porque la historia tamién enllaza al empar cola canción del “Chalaneru”, y dafechu tola historia ta venceyada a ella (salen en dalgún momentu tolos sitios que menta la canción y tamién elementos qu’apaecen nella).
Yo véola como una oda a la tresmisión oral, la música y les histories pa que nun terminen nel escaecimientu.
¿Con qué proyeutu tas agora?
Pues ensin facer munchu spoiler, con una historia de terror a la que yo nomó “Proyectu V”. En verdá yera la opción A pal Enriqueta Rubín, pero magar que tien yá 50 folios tovía-y queda bastante percorríu (amás de que tuvi dellos bloquios con ella).
Tamién tengo en proyeutos siguir cola distopía qu’apaez nel mio relatu “Eutopos” y siguir traduciendo “El pollín d’oru” d’Apuleyo.
¿Dalguna cosa que como escritora te plantegues a llargu plazu?
Facer dalgo de novela histórica. Tengo una idea ehí que yá comenté con dalgunos collacios que nun tien por qué pintar mal, pero ye complicada.
“hai muyeres narradores, y muyeres narradores perbones con obres ensin espublizar, los motivos son distintos pero hai que-yos buscar solución”
¿Cómo ye pa una muyer l’aventura de la publicación y de ganar premios n’asturianu? ¿Pienses que les muyeres lo tenéis en xeneral más, menos o igual de difícil que los homes? ¿Cómo foi nel to casu concretu?
Na narrativa hai veces que paecemos una rara avis, y nun creo yo que’l problema seya como yá escuché dicir, que ye que nun escribimos narrativa (con toles autores que tenemos eses afirmaciones manquen).
Yo tengo claro, y sélo, qu’hai muyeres narradores, y muyeres narradores perbones con obres ensin espublizar, los motivos son distintos pero hai que-yos buscar solución. Pue ser que nos dea más noxu enviar la obra a les editoriales, o nun sé.
Nel mio casu concretu la cosa ye complicada, por dicilo de dalguna manera, porque enxamás tuvi valor d’escribir a una editorial unviando un manuscritu porque tengo mui poca confianza en min. Siempre fui más de concursar porque paez que’l alcuñu me da más seguridá, y si nun llega ser pol retu de cuarentena de Radagast lo más seguro ye que L’home les caparines tuvieran ensin finar.
Lo que si puedo aconseyar ye qu’a min nun se me pue tomar por exemplu y qu’hai que picar a les puertes, sinón ye pa consiguir que t’espublicen, polo menos pa que te digan en qué ameyorar.
“Si nun llega ser pol retu de cuarentena de Radagast lo más seguro ye que L’home les caparines tuvieran ensin finar”
Si hai dalgo que rescampla nes tos obres, a más del recursu a la fantasía, ye’l fechu de que, no formal, les trés son noveles curties: ¿Ye una decisión consciente? ¿Por qué la novela curtia y non otros formatos como la novela más llarga o los rellatos?
En parte ye consciente y en parte non, nel casu d’estes tres primeres porque consideraba qu’allargales más yera añadir partes innecesaries.
Yo siempre escribí relatos, normalmente que nun teníen nenguna unión ente ellos, y eso tamién m’inflúi nel llargor de lo que escribo. Sicasí, el Proyectu V pinta que sí que va ser muncho más llargu n’estensión que tolo anterior.
Otru de los elementos importantes de les tos obres ye la presencia de la familia como un factor importante. Los tos personaxes defínense, en gran midida, pola familia y les rellaciones familiares que tienen: Coses que pasen de madres a fíes, hestories que se caltienen col apellíu, ¿Por qué te llama esta manera d’escribir? ¿Qué piensa la to familia de les tos aventures lliteraries?
“L’home les caparines”, “Trovadoresca” y “No que cinca los seres de lleenda” son obres que tán rellacionaes y que representen respeutivamente la mitoloxía celta y/o clásica (anque nel testu nun apaez especificao); la bruxería y les pantasmes; y la cabera la mitoloxía asturiana.
Non son universos separtaos, de fechu nun sedría imposible nin improbable que los personaxes de les tres s’atoparan nun futuru pol camín vital que siguen al final. Y ye más, en “No que cinca” hai una alusión indireuta a les otres dos nún de los diálogos.
La mio familia ta encantada con ello y sofítenme dende que soi bien pequeña.
La mitoloxía asturiana foi un tema escaecíu de la lliteratura asturiana d’adultos hasta va poco. ¿Por qué esi escaezu? ¿Por qué esta recuperación?
La mitoloxía asturiana, al mio mou de ver, tien la etiqueta d’infantil dende va munchu tiempu, cuando la realidá ye que yera daqué casi que tenía l’envís de dar mieu y desplicar lo inesplicable. Alcuérdome que cuando yera neña, sacantes de la Güestia, solíen pintalos como seres máxicos ensin maldá.
Yo consideraba que podía usase d’otra manera, que por qué si otres lliteratures usen les mitoloxíes con anovaciones como argumentu nun podíemos nós facelo tamién. Nun sé si a la fin lo consiguí, pero bono.
“La mitoloxía asturiana, al mio mou de ver, tien la etiqueta d’infantil dende va munchu tiempu, cuando la realidá ye que yera daqué casi que tenía l’envís de dar mieu y desplicar lo inesplicable”
¿Cómo ves la situación de la lliteratura asturiana anguaño? ¿Qué-y falta? (Si ye que-y falta dalgo) ¿Qué-y sobra? (Si ye que-y sobra dalgo?
Falten-y más muyeres espublizando narrativa, el númberu en comparación colos homes ye alloriante, más entá cuando la primer novela de la nuesa lliteratura escribióla una muyer.
Amás, xéneros como’l terror o la ciencia ficción siguen escaseando. Tamién-y falta muncha inclusividá.
Tamién me falten delles autores como pue ser Anne Rice, Úrsula K. Le Guin (anque sé que se ta traduciendo Terramar) o la obra de Phillip Pullman o Stephen King, por dicir dellos nomes.
¿Y la xente mozo na lliteratura asturiana? ¿Paezte que tien la visibilidá que merez? ¿Cómo ameyoraríes la so visibilidá – si ye que pienses que merez más?
Revistes como Formientu ficieron y anguaño faen por dar visibilidá a la xente mozo qu’escribe. Puedo dicir que nel mio casu gracies a ella siguí escribiendo y tirando pola mio lliteratura.
Siguimos faltando nes distancies llargues, nes obres que sean más llargues qu’un relatu, y creo que les editoriales tienen que puxar por esa xente mozo, porque son el futuru de la lliteratura.
“Revistes como Formientu ficieron y anguaño faen por dar visibilidá a la xente mozo qu’escribe. Puedo dicir que nel mio casu gracies a ella siguí escribiendo y tirando pola mio lliteratura”
Diez años escribiendo y hubo quien dixo que nun teníes “voz propia”. ¿Qué ye tener una voz propia? ¿Cómo pienses que ye la tuya? ¿Hai condescendencia pa cola xente mozo y pa coles muyeres?
Pues ye daqué que nun tengo claro lo que significa y interpreto como tener un estilu que se reconoza. Nel mio casu prestaríame poder anovar y poder tener la capacidá d’escribir con estilos diferentes (y de momentu nun fui capaz) y sorprender al que va lleer lo qu’escribo.
Nun tengo claro como ye la mio voz, lo que tengo claro ye que na mio obra siempre voi puxar por reflexar inclusividá y tamién muyeres que nun seyan floreros.
La condescendencia cola xente mozo y coles muyeres ye más vieyo que la lliteratura: si yes xoven y/o muyer van señalate doblemente y búscate los errores más fonderamente.
Amás d’escritora yes profesora d’asturianu nun institutu. ¿Cúala ye la perceición de los tos alumnos de la lliteratura asturiana? ¿Qué cambia la esperiencia educativa de cara a abordar la xera de la escritura?
La verdá ye que la xente mozo llee menos y mira más pal conteníu audiovisual al mio mou de ver, pero nun critico, porque son una xeneración que nació col móvil y con accesu a una montonera de conteníu y tou esi conteníu tien tamién el so valir.
La esperiencia educativa inflúi, polo menos en min, a la hora d’escribir porque insconscientemente siempre miro’l valir didáuticu y que se puedan ver representaos no qu’escribo.
