Blanca Fernández Quintana (Bimenes 1994) ye, amás de profesora d’asturianu, la novelista más moza con obra publicada n’asturianu hasta’l momentu. En 2020 asoleyó con Radagast la novela “L’Home les Caparines”, en 2021 ganó’l premiu Enriqueta González de narrativa moza de la Conseyería de Cultura cola obra “No que cinca los seres de lleenda” y tamién ganó la primera edición del Premiu Radagast de Fantasía, Ciencia Ficción y Terror cola novela “Trovadoresca” que ta acabante d’asoleyar. Falamos con ella de la so nueva obra, “Trovadoresca” pero tamién de la lliteratura asturiana onde echa en falta más muyeres narradores, inclusividá o novela erótica; pero sobre too noveles xuveniles.

Imagen
Trovadoresca, la nueva novela de Blanca Fernández Quintana

Tien una bona cantidá de llectores encantaos con L’Home les Caparines que, probablemente, tean naguando por facese con “Trovadoresca”. ¿Qué tienen distinto y qué tienen asemeyao les dos noveles?

Paécense en que dambes tán protagonizaes por dos moces, qu’amás pierden un familiar y que les dos entren dientro de lo que podríemos dicir el xéneru fantásticu. Sicasí, el tonu ye bien distintu: Trovadoresca muévese más na llinia del humor, pero al empar trata un tema trescendental pa lo que ye la nuesa lliteratura. Ye probable tamién que los personaxes de Trovadoresca seyan más complexos.

Diendo a lo concreto. ¿Qué va atopar el llector en “Trovadoresca”

Va atopar una historia de fantasía urbana con bastantes toques d’humor, na que la protagonista tien que descubrir por qué hai una maldición familiar consistente en que se-yos apaeza una pantasma, Bermudo, qu’amás diz ser un trovador perconocíu de la Edá Media.

El domingu na ceremonia de fallu del segundu premiu Radagast hebo quien señaló que Trovadoresca yera “tovía meyor” que L’Home les Caparines. ¿Compare esi análisis?

Ye más complexa, eso ta claro. L’home les caparines ye mui llinial y Trovadoresca tien más saltos temporales nel filu que cuenta la historia, tien más personaxes y entemécense más elementos y situaciones. Amás, pa min siempre foi más difícil consiguir que daqué seya cómico que dramático. Tamién, magar que finé primero la primer versión de Trovadoresca que la otra, el tener L’home les caparines pente medies fexo que cambiara munches partes de Trovadoresca y ameyorara.

” L’home les caparines ye mui llinial y Trovadoresca tien más saltos temporales nel filu que cuenta la historia, tien más personaxes y entemécense más elementos y situaciones. Amás, pa min siempre foi más difícil consiguir que daqué seya cómico que dramático.”

Blanca Fernández Quintana na presentación de “Trovadoresca”

En 2020 saca novela, en 2021 sácala Xaime Martínez, en 2022 sácala Andrés Fernández y va sacala Adrián Carbayales… ¿Qué pasó cola narrativa asturiana hasta l’Andanciu? ¿Nun s’atrevíen a publicar? ¿O nun queríen? ¿Por qué esi cambiu en 2020?

Pues nel mio casu la falta tiempu. Nel 2019 yo taba tovía estudiando y ensin munchu tiempu llibre, lo que menos taba yo yera pensando en publicar, y tampoco n’escribir. Col COVID-19 tuvi que parar y quedar en casa, y eso diome’l tiempu suficiente pa finar L’home les caparines. Yo creo que foi pa toos un puntu d’inflexón, nel garramos aire y tiramos p’alantre. Dempués, cuando yá lo tienes entamao, tires p’alantre.

Tamién pue influyir qu’al ver a xente nuevo publicando y anovando mos animáramos unos a otros, tamién ye verdá.

“Yo creo que [l’andanciu] foi pa toos un puntu d’inflexón, nel garramos aire y tiramos p’alantre”

L’acoyida de L’Home Les Caparines foi tan bona que mos consta qu’a dalguna presentación en escueles tuvo que firmar archivadores y dalgún escolín llevó una semeya tuya pa que-y la firmares. ¿Cómo sienta ser un ídolu pop? ¿Por qué cree que conectó tan bien esa novela col públicu llector?

Yo creo que conecto porque ye una historia cenciella que val tanto p’adultos como p’adolescentes. Personalmente que digan que dalgo ye xuvenil o non dame igual a la hora de lleelo. Nun sé por qué hai xente a la que-y molesta que la so obra pueda ser “calificada” de xuvenil o apta pa xente mozo, a la fin son ellos los falantes y llectores del futuru.

Home, lo d’ídolu pop yo creo que ye pasase, yo tamién soi profesora, y l’añu viniente podría selo de dalgunos escolinos que lleeran una de les mios noveles y nun-yos paecería tan raro veme nel so institutu. A min préstame, ta claro, y tamién me presta que me conozan en persona y nun ser solo un nome nel llombu d’un llibru y una semeya.

“préstame que me conozan en persona y nun ser solo un nome nel llombu d’un llibru y una semeya.”

Blanca Fernández Quintana na presentación de Trovadoresca nel momentu en qu’Aique Fernandi recoyía’l II Premiu Radagast

Entrando ya no personal: ¿Qué te motiva a escribir?

Pues nun sabría dicilo, préstame contar histories y maxinales y poneles per escrito, y sobretoo tentar d’anovar y facer histories que seyan dalgo novedoso pente les que yá hai.

Cuando te sientes delantre de la fueya en blanco… ¿Pa quién escribes? ¿Pa ti, pa un públicu llector? ¿Qué públicu concretamente?

Yo siempre suelo escribir pa la xente mozo, porque creo que faen falta entá más llectures qu’ellos puedan lleer y esfrutar y que tengan más xéneros y diversidá nelles.

Paez, vistes dalgunes reseñes sobre L’home les Caparines, que la bona acoyida nun ye unánime. ¿Qué pienses d’esto?

Ye imposible (o casi imposible) escribir daqué y que-y guste a tol mundu, y menos siendo la primer novela. Yo suelo pasar bastante d’estos temes, porque de poco sirve agobiase con daqué que yá ta espublizao y nun se pue cambiar. Yo voi siguir escribiendo y tentando d’ameyorar, eso ta claro.

Soi un rapaz o una rapacina de la ESO o bachilleratu a quien-y presta escribir n’asturianu pero que nun les tien toes con sigo. ¿Qué me diríes?

Pues que como dicen la práutica fai al mayestru, que lo tente y que ye normal enquivocase, pero qu’eso nun te tien que torgar y facer que dexes d’escribir.

Xunto con otros escritores y ilustradores fundasti recientemente la tertulia L’Aruelu. ¿Qué ye esactamente L’Aruelu? ¿Con qué envís lo fundastis? ¿A quién ta abierto?

Ye una tertulia venceyada al xéneru fantásticu, de ciencia ficción y terror, tamién venceyada a los videoxuegos y a los conteníos más alternativos. Ye’l caberu vienres de cada mes n’Uviéu (normalmente nel Carpe Diem). L’envís ye qu’autores o xente interesada se pueda averar, interactuar sobre lliteratura y aldericar y tamién dar sofitu, apoyu y conseyos pa los que tean escribiendo o entamando cosuques. Ta abierto a quien quiera dir.

Logo de la tertulia “L’Aruelu” a la que pertenez Blanca Fernández Quintana

Dende Radagast dicen que’l Celsius 232 ye una ventana al mundu de la fantasía asturiana. ¿Vamos poder vete esti añu nel festival Celsius?

Yá soi habitual ellí pol cosplay y tolo venceyao al cosplay. No lliterario, esti añu presento Trovadoresca y l’añu que vien No que cinca los seres de lleenda. Ye difícil que yo falte un añu a esi festival.

¿Qué-y falta a la lliteratura asturiana?

De too un poco: más muyeres narradores, más novela romántica o erótica, más inclusividá, más novela de xéneru, ampliar el catálogu de noveles nos xéneros más espardíos…tamién-y falta muncha novela xuvenil.

Tamién falten traducciones, como ye la obra de Ursula K. Le Guin, Anne Rice, Stephen King,…vamos, que falta muncho.

Y a ti concretamente, ¿Qué te prestaría poder lleer n’asturianu?

A min prestaríame muncho poder lleer a Anne Rice y a Stephen King n’asturianu, y tamién qu’haya más novela histórica y de xéneru. Y sobre too, qu’haya más inclusividá no que s’escribe.

Va poco tuvisti presente na manifestación pola oficialidá del Día de les Lletres. ¿Por qué paez que cuesta tanto políticamente llegar a la oficialidá?

Porque la oficialidá del asturianu ta politizada, y un idioma nun debería d’usase como arma ideolóxica o como moneda de cambiu pa consiguir otres coses.

Leave a Reply

La to direición de corréu nun va espublizase.