Blanca Fernández (Bimenes 1994) ta acabante d’asoleyar la novela curtia “L’Home les caparines” y convertise na novelista más moza de la lliteratura asturiana. La novela, con prólogu de Marta Mori y publicada pola Editorial Radagast, ta yá nes llibreríes d’Asturies.
¿Qué va atopar el llector en “L’Home les Caparines”? ¿Pa qué públicu ta empobinada?
Pues va atopar una historia qu’entemez lo real colo fantástico, y na que se contraponen dos protagonistes, que se llamen dambes Alicia, de dos époques distintes (una de la Posguerra y otra más actual), too esto con una lleenda sobro la muerte que tien visos de ser verdá, y que ye la qu’introduz lo fantástico na novela. Ye una historia que tien más capes de les que paez. Desplicalo meyor que yo la sinopsis de la novela (soi mui mala pa los resúmenes h.ah.a).
“Equí hai una lleenda que diz que cuando vas morrer, trés díes enantes, una caparina apaez. Una caparina tan especial que cuando la ves sabes el tiempu que te queda…” Alicia camentaba qu’aquel branu diba ser inolvidable, y en verdá nun s’enquivocaba: aquel diba ser el meyor y el peor branu. La muerte de la güela diba llevala a ella y a la familia a un requexu onde les lleendes entá viven y onde dicíen que la muerte yera previsible. Ellí va conocer a otra Alicia, una muyer a la que la xente tien medrana d’averase, y qu’escuende una hestoria estraordinaria y un secretu que xune’l pasáu y el presente.
No que cinca al públicu, yo diría que val tanto p’adultos como pa mozos, y que dependiendo de la edá de quien la llea va llama-y más l’atención una parte o otra de la historia, seguramente tenga más empatía con una Alicia o otra. Tengo que dicir que pa min la llende ente xuvenil y adulto siempre foi difusa y nun soi amiga de les etiquetes d’edá a non ser que la historia tenga temes o situaciones non aptes hasta nun tener ciertos años.
¿Cómo foi’l procesu d’ellaboración de L’Home les Caparines?
Pues nun sé si dicir inconstante o llargu. La primer vez qu’escribí la historia foi con 17 años, en versión de relatu curtiu (y nun sé tovía cómo algamé una mención especial nun concursu con elli). La verdá, que nun me vía cola capacidá pa escribir una novela. Llueu decidí facelo novela, porque nel relatu faltaben munches idees y xiros, y debí d’entamala va cuatro años, tuvi un bloquéu y dexelo reposar (tengo la costume de facer esto), y a la fin a finales de 2019 retomélo, y la cuarentena foi un bon momentu pa finalo.
Va poco ganó’l tamién el premiu Radagast de fantasía, ciencia ficción y terror ¿Tienen dalgo que ver les dos obres, L’Home les Caparines y Trovadoresca?
Sí y non. En común tienen que la protagonista ye moza y muyer y pierden a un familiar cercanu, y que tán cuntaes en primer persona (magar que los mios relatos suelen ser en tercer persona, les dos noveles coinciden neso) y que tienen que resolver un misteriu.
L’homes les Caparines foi escrita col envís de qu’elementu máxicu fuera una lleenda non venceyada a la mitoloxía de nueso, y Trovadoresca xuega cola bruxería y la lliteratura que nun nós llegó. Estes dos tendríen de dir acompañaes d’una tercera que nun acabé, esta sí xunía a la mitoloxía asturiana.
Amás de too esto, creo que Trovadoresca ye una obra con un toque cómicu que L’home les caparines nun tien, pero dambes son prestoses a la so manera.
Yes la persona más moza n’asoleyar una novela dende 2008. ¿Paezte difícil pa la xente mozo facese un güecu na lliteratura asturiana?
Ye complicao, porque tener el valor a unviar un manuscritu a una editorial o un concursu ye un pasu difícil, un pasu que vien dempués de trabayar un manuscritu, que lleva munchu tiempu. El mieu a que te dean p’atrás un manuscritu ta ehí siempre, y magar que nun ye daqué pa desanimase, siempre afeuta. Amás, atopar concursos empobinaos a xente mozo yera complicao (digo “yera”, porque agora va convocase l’Enriqueta Rubín de novela pa xente mozo, y eso ye un bon pasu).
Como profesora d’asturianu. ¿Cómo ves la situación del enseñu de la llingua y la lliteratura asturiana? ¿Conoz l’alumnáu d’asturianu la so lliteratura y los sos clásicos?
La situación ye meyor que va unos años (hai más matrícula), pero la valoración de l’asignatura sigue siendo, en xeneral, la de la optativa fácil, y romper esi estereotipu ye daqué que lleva tiempu y non solo nun cursu (y a esto la interinidá nun ayuda). Dellos conocen dalgo de lliteratura, y los clásicos conócenlos cuando-yos fales d’ellos en clas, pero los que tuvi yo hasta agora, la mayor parte, lo que conocen ye gracies a l’asignatura de Llingua Asturiana.
Amás d’escritora tas activa nel mundu del cosplay y de los videoxuegos. ¿Paezte que la lliteratura asturiana vive dándo-y el llombu a estes nueves artes?
Yo nun diría que la lliteratura asturiana te dando’l llombu a estes artes, si pares a pensar n’otres lliteratures tampoco ye qu’haya munchos llibros lliterarios que tengan esos temes. Si vamos a la llingua, nel cosplay magar que paeza poco, el tener la oportunidá de qu’haya un programa (Cosplaypresta) ye muncho más que lo qu’atopes n’otres llingües, y nos videoxuegos,…bono, ye una asignatura más grande la que ta pendiente, porque lo que fai falta n’asturianu ye doblaxe y traducción de conteníu audiovisual como películes, series,…les series infantiles y xuveniles son un axente normalizador abondo grande y qu’otres llingües peninsulares supieron emplegar.
Les muyeres novelistes n’asturianu cuéntense práuticamente colos deos de dambes manes. ¿Nun te da vértigu tar nesa llista tan curtia? ¿Hai un techu de cristal pa les muyeres nes nueses lletres?
Sí que lu da, y sobre too pola calidá lliteraria que tienen toes elles, yo siéntome pequeña al llau d’esos nomes. No que cinca al techu de cristal, sí, dalgún problema tien qu’haber, porque tenemos muyeres estraordinaries faciendo relatu curtiu, poesía, teatru,…pero en noveles el númberu baxa de sópitu, y creo que les muyeres tenemos muncho que contar y que dicir.
¿Qué-y falta a la lliteratura asturiana?
Falten-y más noveles, tanto p’adultos como xuveniles, falta-y más variedá de xéneros. Tamién falten-y más llectores que la conozan y la consuman. Sé que cada vez llee menos xente, y non solo na nuesa lliteratura, pero creo que’l númberu de llectores de lliteratura asturiana ye pequeña en comparanza colos falantes. Pue que faiga falta promovela más, facer porque se conoza y promover más actividaes con ella.
“a la lliteratura asturiana falten-y más noveles, más variedá de xéneros y más llectores”
¿En qué proyeutos lliterarios (o non) tas metida agora?
Pues agora mesmo toi trabayando más nuna novela xuvenil (y fantástica) qu’espero terminar esti añu, magar que tengo otra entamada de terror que nun sé cuando terminaré (lo de dexar coses paraes paez que ye marca de mio).
La novela “L’Home les Caparines” tien un PVP de 12€ y pue mercase nes principales llibreríes d’Asturies amás de la web de la editorial: www.edicionesradagast.com.
