Yá vos contamos va unos meses (equí) qu’había una bona polémica cola versión nueva de Blancañeves. Pa nun firir sensibilidaes, Disney decidió que yera meyor sustituyir los siete nanos por siete “bandíos” o “creatures máxiques” de distintos xénero y etnies, a lo que l’actor Peter Dinklage (Game of Thrones) respondió, fadiáu, que lo que taben faciendo yera quitar a la xente del so altor les poques oportunidaes que teníen como actores. El lluchador de la WWE, Dylan “Hornswoggle” Postl, tamién se quexó d’esa “esclusión forciada”.
Y anque Disney yá tenía, pelo menos, delles escenes grabaes (pos hai semeyes d’eses siete “creatures”) paez que les crítiques ficieron que dean una vueltina al plantegamientu, porque agora sal una imaxe nueva na que vuelve a haber nanos. Unos nanos que tamién provoquen la polémica, porque abulten ser dafechu efectos dixitales, quiciabes demasiao asemeyaos a los de la película de dibuxos. Asina, siguiríen ensin dar trabayu a actores que carecen esti problema, amás de que… bono, los siete nanos vense raros, y hai quien los compara cola primer versión de Sonic. La que, poles crítiques, retrasaron la estrena de la película p’ameyorala.
Y eso ye precisamente lo que Disney decide facer agora. Anuncia que retrasa la película hasta 2025. Calculen que la película tien de recaldar bastante más de trescientos millones pa nun producir perdes (a lo qu’habrá que sumar lo que gasten nestos cambios nuevos), y hai mieu na compaña a que seya un fracasu como la versión nueva de La serenina.
Arriendes d’eso, por si Disney nun tuviera yá bastantes problemes, la conservadora The Daily Wire ta más cerca d’ellos d’estrenar “una versión non woke” de Blancañeves, Snow White and the Evil Queen, y de la que vos dexamos equí un pequeñu avance que ficieron, claramente más cercana al cuentu.
Nun sabemos cuálu va ser el resultáu final, pero ta claro que tanto con Marvel, con Star Wars, y agora colos clásicos animaos, les coses nun van pa Disney tan bien cómo-y gustaría.
