Nestos útimos tiempos ta habiendo fracasos bien sonaos nel mundu de los supehéroes, y por más midíes que tomen Disney y Warner (unos quieren amenorgar la sobreesplotación de los sos personaxes, los otros dieron un volantazu dando la direición del universu cinematográficu a James Gunn) los proyeutos son tan descomanaos que nun puen parar les máquines. Como se tarda una barbaridá en sacar alantre cada película, más por ser supreproducciones y con tantos efeutos especiales, los estudios siguen cola inercia de cuando les coses nun paecíen dir mal. Y, asina, siguen saliendo productos que cuerren direutos al desbentíu.
L’últimu casu ye la de la acabante d’estrenar Blue Beetle, sobre un personaxe secundariu (o quiciabes terciariu) de DC y na que gastaron, namás na producción (habría que contar tamién lo gastao na publicidá) nada menos que cientu venticinco millones de dólares. Y nel so primer fin de selmana foi a recaldar namás 16,7 millones de dólares nos mercaos norteamericanos, lo que la convertiría nel mayor fracasu del sieglu pa la compaña, inclusive pembaxo de la recién y, considerada por tol mundu una picia, Shazam! Fury of the Gods. (Bono, hemos aclariar que, téunicamente, la medaya sedría pa Wonder Woman ’84, pero nun suel contase porque s’estrenó en tiempos d’andanciu y salió al empar pa ver en streaming, onde prefirieron vela munchos espectadores.)
Esto ye, amás un problema pa James Gunn, pos contaba con Blue Beetle como ún de los personaxes colos que si siguiría tres la renovación del universu que tien ente manes.
Blue Beetle ye un personaxe mui recién del Universu DC, masque lleva’l nome d’otros dos superhéroes anteriores, remontándose’l primeru a 1939). A esti creáronlu en 2006, y ye un rapaz d’orixe hispanoamericanu y familia humilde qu’un día alcuentra un escarabayu máxicu que-y da poderes. Protagonizó una serie de trenta y seis númberos de 2006 a 2009 y una de diecisiete de 2011 a 2013.
Por si vos llama l’atención, dexámosvos l’avance calcando equí.
