Va muncho que tamos avezaos a que ciertes coses, como puen ser el cómic o’l manga, traten sobre manera sobre aventures de seres con superpoderes o artiluxos imposibles, colos que faen coses que son dafechu imposibles. Dacuando surde la crítica, como aquella d’Alan Moore que dicía que los superhéroes atapen a los héroes de verdá, y nun nos permiten ver que nós mesmos podemos cambiar el mundu. La verdá que yá cuasi nun se lleven nin los vaqueros, nin los soldaos, nin siquiera los astronautes… Quiciabes sí dalgo en China, con delles películes de catástrofes.
Podemos o non tar d’alcuerdu con estes cuestiones plantegaes, pero sí ye verdá que nun se ve davezu dalgo como lo que s’estrena la selmana que vien en Crunchyroll, la plataforma de streaming d’anime de referencia. Y ye que Firefighter Dago: Rescuer in Orange tien como protagonistes a unos bomberos, y unos que nun llancen agua peles manes nin nada paecío. A lo llargo de la serie, como del manga de Soda Masahito qu’adapta, el protagonista y los sos dos collacios han enfrentase a fueos quiciabes un poco esaxeraos, cuasi apocalípticos, pero sacantes los efectos visuales y les grandonaes son persones reales encarando problemes verdaderos.
Va estrenase’l trenta de setiembre, y dexámosvos l’avance calcando equí. Ah, y vamos facer una apuesta; ¿cuántos neños se convertirán en bomberos con esta serie? Porque Indiana Jones valió pa facer arqueólogos y Jurassic Park pa paleontólogos, ¿o non?
