Cuando estrenaron la serie de televisión de The Walking Dead nun tardé n’aficioname a ella. Yera la vuelta de los zombis clásicos que siempre me prestaren, mui como en La Nueche de los Muertos Vivientes de George Romero. Embruxilóme tanto, en realidá, que mientres finaba la segunda temporada yá andaba yo mercando tolos cómics que salieren y adelantrándome a lo que teníen cuntao na serie. Nun tardé migaya en decatame de que’l material orixinal taba mui penriba del de l’adautación, nun siendo esta más qu’una versión amorosada d’un rellatu daveres espantible. Ún nel que (pelo menos na primer metá de los cuasi doscientos capítulos) los personaxes acolléchente más cuanto más xabaces y incivilizaos se tornen. Los autores preséntente un mundu horrorosu, ensin esperanza dala, col que son a facer que, cuando un personaxe se pon repunante y diz coses como “nun faigamos eso, ye inhumano” nagües porque nun-y quede muncho enantes d’un zombi ñascalu. Pa enantar tala atmósfera, l’estilu de narración ye bien sobriu, en blancu y negru, con composiciones de páxina cencielles y ensin munchu adornamientu. De fechu, ye sabío que’l guionista tevo d’engañifar a la editorial con que los zombis yeren parte d’un plan estraterreste pa invadir la tierra, porque yera la única manera de qu’a esta-y paeciera una serie vendible. Ye bultable qu’al adautar una hestoria d’esta mena pa convertila nuna superproducción, con milenta estres pintaos de zombis y les coraes colgayando, con una banda sonora enllena de música épico, y que mira por nun espantar demasiaos espectadores, l’efeutu nun tarda n’esllir.
Per otru llau, y aparentemente ensin nada que ver, teníemos The Asylum, una productora de lo más chambona que vive sobre manera de los llamaos mockbusters, copies descaraes de películes recaldoses que faen a tou meter pa sacales al empar que la verdadera. Casos, que ye meyor que nun tentéis de ver, son Transmorphers (en cuenta de Transformers) o Atlantic Rim (en cuenta de Pacific Rim). La verdá ye que naide nun podía esperar que saliera dalgo nin medio decente d’esta productora. Y por embargu, nun se sabe mui bien cómo, salió.
En 2019 estrenaron en Netflix la primer temporada de Black Summer, ocho episodios de lo que les tenía toes pa ser otra serie de zombis más del montonáu. Nengún de los creadores nun tenía fecho dalgo mui señalao. Por embargu, amosaron un gran inxeniu al convertir nuna ventaya que-yos dieren un presupuestu baxu y que nun hubiere munches espeutatives puestes nellos al facer una serie más cercana al espíritu de The Walking Dead que la mesma adautación. Agora, tres d’un atrasu pola mor del andanciu, ta acabante d’estrenar la segunda temporada.
Black Summer nun quiere ser una serie más fecha col moldu de les otres. Tien planos secuencia bien llargos, pocos diálogos y una banda sonora cuasi inesistente. Nella, preséntennos unos cuantos personaxes y amuésennos cómo van sobreviviendo a los muertos vivientes, forciándolos les circunstancies de cuando en vez a axuntase o separtase. Naide nun ye tan bono que nun seya dable qu’acabe matando a sangre frío, si ye que’l mundu nuevu lu empobina a ello, y naide nun tien protagonismu talu que nun puea morrer nos cinco minutos vinientes. La tensión ye’l puntu fundamental de la serie, y una escorrida pue durar tou un capítulu ensin que podamos tar nunca seguros de si va finar bien o mal. D’otra manera, cada episodiu ta tamién dividíu n’escenes con títulu propiu, y nun ye raro qu’estes tean desordenaes nel tiempu o vaigan alternando ente unos personaxes y otros p’amosar perspeutives distintes d’un mesmu fechu, y de pasu guardar dalguna sorpresina pal final.
Nun ye, hai que lo dicir, una serie pa ver mentanto eches unes güeyadines al teléfonu, porque eso ruempe dafechu’l ritmu y yá nun vas ver más que xente corriendono, berrando o mirándose torcío. A una de les peores compañes cinematográfiques de Hollywood enxamás creaes, paez que de milagru, salió-yos una serie que ye puru cine: pa la que necesites silenciu, lluces apagaes y poner tola atención no que t’amuesen.
