Bruce Lee Entertainment, la empresa que xestiona los drechos d’imaxe de la gran estrella que fizo famoses en tol mundu les artes marciales, tien en marcha un proyeutu que nun pinta nada mal. Y esto ye, nada menos, una serie d’anime protagonizada por él.
Shannon Lee, la fía, guioniza la viniente House of Lee, y comenta que-y presta pola vida l’animación porque nellla pue crear una hestoria con componentes fantásticos, pero na qu’al empar so pá siga siendo so pá. Nella, basándose na cita aquella de Bruce, “los que nun son conscientes de que caminen pela escuridá nunca van buscar la lluz”, esti va tener de dir reclutando a “los Guerreros del Cuélebre” primero de que les tiniebles se faigan col mundu. Según cuenten, la serie “toca temes d’espiritualidá, llucha contra los demoños interiores y la herencia asiática”, y el cuélebre ye un animal que ta de siempre mui venceyáu a la figura de Lee, non solo a la mitoloxía china. De fechu, la última película que fizo yera Enter the Dragon (1973), y la película biográfica titulóse Dragon: The Bruce Lee Story (1993).
Tres ver el curtiu de Shibuya, White Rabbit (que vos dexamos calcando equí, por si tenéis curiosidá), tuvieron claro que queríen que fuera esi l’estudiu que s’encargara de la serie, y paez ser que tán mui contentos col resultáu. De momentu, nós namás podemos ver un avance bien curtín, pero nel que yá podemos facenos una idea del estilu retro que tien… y de la pintaza.
Dexámosvoslu calcando equí.
