Como vos tenemos contao nesti portal, la nueva fuelga de guionistes lleva un tiempu provocando grandes atrasos en Hollywood, inclusive grandes producciones como les de Marvel tán cambiando les feches d’estrena dellos meses o hasta un añu. Nun paez que tean cerca de llegar a nengún alcuerdu, y ye que, como vos contábemos equí, mientres qu’una de les condiciones yera que nun usaren IAs pa escribir guiones, a los productores nun se-yos ocurrió otra cosa qu’empezar a facelo énte la falta de trabayadores, cola esperanza de que pronto vuelvan y retoquen les hestories “creaes” por ordenador pa que seyan rodables.
Yera cuestión de tiempu, si la cosa s’allargaba, qu’empezaren non yá a retrasar proyeutos, sinón direutamente a dexalos pa prau, y agora sabemos que’l primeru en cayer ye’l remake de gran presupuestu (en forma de serie) d’una hestoria de lo más prestosa: Metropolis de Fritz Lang.
Según cuenta Deadline (equí) la versión nueva d’esti clásicu de ficción científica, con Sam Esmail (Mr. Robot) a la cabeza (como direutor, guionista y productor executivu) queda ensin siguir p’alantre pol entemez del altu costu que diba suponer y lo incierto del momentu, por nun saber qué va pasar cola fuelga. Lo que nun-y debe ser nada fácil, a Esmail, porque polo que cuenten llevaba dándo-y vueltes a la idea más de siete años.
Metropolis ye un clásicu del espresionismu alemán, estrenáu ya va cuasi un sieglu, en 1927, y que nos presentaba una sociedá futura de gran desigualdá y inxusticia na qu’una xinoide (una robó femenina) apaez como nueva mesíes que guía al pueblu a una forma nueva de sociedá. La estética art déco, l’argumentu tan metíu nel espíritu de la dómina o que seya la primer gran película de ficción científica puen ser causes poles que la UNESCO la tien declarada patrimoniu de la humanidá, y les sos influyencies son clares n’otres obres como Blade Runner o The Fifth Element, en cómics (con obres como l’homenaxe en Superman’s Metropolis, qu’entemez esta hestoria cola del superhéroe) y hasta na moda (vistíos de Lady Gaga o Beyoncé).
¿Dalguna posibilidá de que se retome’l proyeutu cuando la cosa se calme? Dende Refuelgu guardamos una pequeña esperanza.
