Entamen yá les males noticies pal mundu de la cultura por mor del coronavirus. Los organizadores del E3 de Los Angeles confirmaben va unes hores la cancelación del E3 de 2020 pa evitar el riesgu de contaxu pol coronavirus. Queda agora ver qué va pasar coles presentaciones que taben previstes, si les compañíes van faceles n’otra feria de menor nivel o si van sacar los xuegos ensin los presentar nuna d’estes conferencies. Lo cierto ye que’l ritmu de difusión del virus nun paez presaxar que vaiga haber más ocasiones “físiques” pa velos; polo que’l modelu de presentación nun futuru podría ser el online.
Pero… ¿Qué ye lo que mos perdimos? De mano, impónse la tranquilidá: Nun tener una presentación oficial nel E3 nun supón l’anulación del xuegu y too fai pensar que, anque puede ser que con daqué de retrasu, los xuegos van acabar saliendo. Nun ye’l xuegu’l que se daña sinón el nuesu “Hype”. Les novedaes que prometía l’E3 de Los Angeles nun yeren poques.
Les coses que nun veremos nel E3 de 20202
Bethesda: Ghostwire Tokyo y Deathloop. Estos yeren los títulos que diba presentar la compañía Bethesda – sí, la mesma que mos tien tovía esperando pol Elder Scrolls VI ensin damos más noticia qu’aquel videu baleru de va años -. Estos dos títulos llancen propuestes estremaes de les que suel llanzar l’estudiu. Mientres que Ghostwire Tokyo ye un videoxuegu d’horror y supervivencia ambientáu en Toquio onde se fai una apuesta pola supervivencia en primera persona y pa un xugador; y non lo qu’a lo último s’entiende por supervivencia, que nun dexa de ser un battleroyale. Esto paez que podría tener una narrativa más interesante que, por desgracia, ta bien ausente de los más de xuegos online. Deathloop pela so parte ye un FPS qu’innova un poco meciendo’l conceutu clásicu del FPS con ambientalu nuna especie de “Día de la Marmota”.
Microsoft: Si tábemos naguando por dalgo de Microsoft, esi dalgo yera’l Microsoft Flight Simulator 2020; un xuegu que prometía (Y sigue prometiendo) llevanos a tolos aeropuertos del mundu y velos tal cual son. Un xuegu, del que dixeron que yera posible ver la to propia casa dende l’aire, pos pa facelu garraron les informaciones de los satélites de Google Maps. Esto, xunto con unes físiques munchísimo más trabayaes qu’enantes, lleva al FS2020 a un nuevu nivel. Nun lu veremos nel E3, pero si tenéis un ordenador que pueda facelu furrular, de xuru que vais poder despegar un Airbus del Aeropuertu d’Asturies o aterrizar una Cessna nel Aeródromu de Llamorgal.
Sony: Nel casu de Sony, l’anuncia pola que toos taben naguando yera la presentación de la PS5. Nun la van presentar nel E3 pero yá primero de que se cancelare, nun contaben con facelo. La especulación sobre la fecha de llanzamientu sigue y ye daqué polo que tán naguando tanto los fans de Play Station como los d’otres plataformes que saben que, una nueva xeneración de videoconsoles, ye tamién una nueva xeneración de videoxuegos en tolos demás soportes.
Ubisoft: Ubisoft ye la compañía europea (francesa) de referencia y ún de los pesos pesaos (quiciabes l’únicu européu) nel E3. Anque nun vaiga haber E3 yá dieron anuncia de que taben planiando un eventu dixital de presentación de los títulos que tán preparando sacar. ¿Cuálos son? Un Assassin’s Creed ye siempre una posibilidá, la saga más llonxeva y que más presta de toles de la compañía bien podría dar anuncia d’un nuevu títulu. Tamién, taba claro que yera a lo llargo de 2020 cuando salía Watch Dogs: Legion; la tercer parte de Watch Dogs. Un xuegu de mundu abiertu que mos lleva a un Londres daqué cyberpunk nel que la seguridá invade la vida privada de la xente depués del Brexit. Un xuegu al que tenemos ganes de xugar pol tratamientu tan estremáu al mainstream de les compañíes americanes al que mos tien avezaos Ubisoft nesta saga.
Más coses: Arriendes de les grandes desarrolladores y de les “filtraciones”, nun E3 hai siempre sorpreses. Delles de les que yeren “secretos a voces” y poles que más tábemos naguando pueden ser, por exemplu, los rumores sobre un xuegu de mundu abiertu de la saga Harry Potter, un RPG basáu nel lore del personaxe de JK Rowling. Tamién, especúlase cola idea d’un nuevu títulu de Batman
