¿Quién s’escuende tres del nomatu “Carondar”?
Pos tres de Carondar escuendese Moisés. Un rapaz de 35 años que dende bien guahe prestó-y tou esti tema del ociu alternativu: xuegos de mesa, de rol, videoxuegos… Y como Carondar foi un personaxe que fici pa un xuegu de rol, y como nes redes sociales falo principalmente d’estes coses pos quedó asina.
Va poco entamasti un blogue sobre xuegos de mesa y rol, “La Montera Solitaria”: ¿Por qué esi nome? ¿A quién ta empobináu y qué busques facer con él?
Pal nome del blogue quería dar a entender un poco de que se diba a falar nél. Asina que busqué un poco de los mundios de los xuegos, la fantasía y demás y llueu pues algo relacionao con Asturies. Y foi volviendo a ver El Hobbit, la Montaña Solitaria, y al yo facer baille rexonal, pos na cabeza xuntáronse los dos conceutos y d’ehí salió La Montera Solitaria
Y l’oxetivu del blogue pos… Nun soi’l meyor falante nin escritor n’Asturianu. La mio formación resúmese a un cursu que fici na Universidá d’Uvieu. Asina que vi una oportunidá perguapa de siguir deprendiendo poco a poco la llingua de mio güelu y mio güela a la par d’escribir de dalgo que me presta. Amás, l’asturianu va viéndose en munchos más llaos de la rexón, alministración, publicidá, na cai… ¿Por qué non nos xuegos de mesa y rol? Por eso equí tamos, intentando dar a conocer esti mundiu (pese a qu’estos últimos años creció munchu)
¿Hai una comunidá rolera importante n’asturies?
Pos yo creo que sí. Ya entama a ser ca vegada más frecuente atopate con algún collaciu con conocíos que xueguen al rol. Creo qu’esi estigma de que los que xugamos al rol somos “esa xente raro” ta perdiendose, y paezme estupendo. Vense yá proyeutos académicos onde se meten los xuegos de rol nes clases, nes xornaes de lliteratura que poco a poco vese más rol, eventos d’ociu alternativu…
Y yá nun ye solo eso, hai munches asociaciones ufiertando xugar al rol… Mesmamente en Xixón hai 3 o 4, n’Uvieu al menos una, en Mieres otra… Y de xuru que se m’escapa dalguna.
¿Y n’asturianu?
Quiciabes ye’l puntu a ameyorar que tenemos. De xuru qu’hai una comunidá asturfalante que xuega al rol, pasa que nun nos conocemos. Pue ser el momentu, entamen a surxir los xuegos de rol n’asturianu. Ya salió el primeru y el segundo va salir ceo… ¿Por qué non facer una comunidá rolera asturfalante? Munchu ye por desconocimientu, hasta fai poco al rol xugabes colos collacios y poco más. Agora eso ta ampliandose coles partíes online y demás, tamos a tiempu de subinos a esa fola.
¿Qué eches de menos como productos culturales nel rol y nos xuegos de mesa?
Más difusión nos medios. Y yá non solo nos medios “especializaos” si ye qu’esisten, sinon dalgo más xeneral. Creo que se consiguiría eliminar más l’estigma que tovía pue quedar. Un exemplu foi’l revuelu que s’armó porque’l Ministru de Consumu inaugurase la Feria InterOcio en Madrid. “Perdiendo el tiempu y les perres en xueguinos”, “Nun hai coses más importantes” fueron dellos de les coses que se pudieron lleer y escribir. Si personalidaes, ministros o quien seya van a inaugurar una esposición de cualquier cosa, o s’invierte nun eventu cultural de cualquier tipu… ¿Por qué nesti ta mal visto? Toa cultura ye bona, la que ye sana y sostenible. Esperemos que poco a poco vaya cambiando.
¿Ta volviéndose la comunidá asturfalante cada vuelta más friqui, o la comunidá friqui cada vuelta fala más asturianu?
Más que la comunidá asturfalante se vuelva más friki diría que la xente quitóse un poco la venda de los güeyos. Pero creo que-y paso a los asturfalantes y a los catellanofalantes. Como dixi antes, eso del rol yera pa xente raro, qu’habia qu’alloñase d’ellos. Munchos medios de comunicación, por pura inorancia fomentaron estos comportamientos. Pero tres de la pandemia y el confinamientu abrióse un mundiu que la mayoría de la xente desconocía. Al menos nos temas que yo trato nel blogue, ta demostrao que les ventes d’esti tipu d’ociu aumentaron abondo. La xente vio que yera un ociu sanu, divertíu y que nun tábamos llocos ni dibamos a garrar una katana y acabar cola familia… La desgracia ye que pa eliminar del pensamientu de la xente estes coses tuvo que pasar tolo que paso.
¿Cómo ves el panorama cultural n’Asturies?
Siempre piensando que, como too, pue ameyorase… Paezme que’l panorama cultural n’Asturies ye bonu. Solo ver el branu cola bayura de conciertos, feries de tou tipu… Actos culturales n’asturianu yá nun hai tantos. Si l’alministración apoya la oficialidá igual tien que sofitar más esti tipu d’actos n’asturianu. Si de dalgo tamos arguyosos los asturianos ye de la nuesa cultura, y l’asturianu ye parte d’esa cultura.
Y la escena del ociu alternativu más o menos lo mesmo. Nel branu tenemos dos grandes feches. El festival Metropoli, anque paezme que poco a poco van dexar d’ufiertar esti tipu de conteníu, y la CometCon que va facese en setiembre. Ye un eventu conocíu a nivel nacional y va ufiertando rol, al menos nel cartelu… L’asturianu yá ta un poco escaecíu… Y llueu hai cada poco asociaciones que fan eventos y xornaes de puertes abiertes con actividaes d’esti tipu. Pa ser una rexón “pequeña” creo que podemos presumir de tener munches actividaes y mui variaes.
¿Cómo valores el surdimientu d’iniciatives como Acuto xuegos?
Mui bonu. Cualquier iniciativa o grupu que faiga y cree coses n’asturianu ye una bona noticia. Ta claro qu’el nichu ye mas pequeñu, xente asturfalante que presten los xuegos de mesa, pero como comentamos enantes ye algo que ta cambiando. Y al demandar más de xuru qu’apaecerán más iniciatives del estilu. Oxalá.
