Va tiempu que Wizards of the Coast ta abriendo mercaos nuevos pa les clásiques cartes de Magic: The Gathering, quiciabes porque lleven tiempu ensin causar tantu furor como’l de los años noventa y principios d’esti sieglu. Por embargu, sí ta consiguiendo llamar pelo menos l’atención de los medios de comunicación, como asocedió apocayá (contémosvoslo equí) cola espansión basada n’El Señor de los Aniellos y pa la qu’imprentaron una carta única del Aniellu Únicu (valga la redundancia), n’élficu y con ribetes doraos, que de xuru va convertise na más cara de la historia del xuegu. La última ufierta que sabemos que-y ficieron al suertudu al que-y tocó yera de dos millones de dólares.
Sobre’l xuegu de cartes, que pelo menos nun principiu simulaba l’enfrentamientu ente dos magos, anguaño tienen sacao espansiones de The Walking Dead, Stranger Things o Street Fighter, ente otros munchos, y agora toca la serie más llonxeva y querida de la historia de la televisión británica: Doctor Who. Si, como’l protagonista, venís d’otru planeta y nun sabéis de qué va la serie, estrenada en 1963, podemos resumivos que ye sobre un estraterrestre que viaxa nel tiempu nuna cabina telefónica, que se lleva humanos d’aventuras per tol espaciu y el tiempu y que, cada vegada que muerre, resucita con otru rostru y otra personalidá (lo qu’aprovechen pa cambiar l’actor que lu interpreta). Nunos meses van estrenar nada menos que la cuarentena temporada, cola que va estrenase’l catorcenu Doctor.
Polo estenso de la mitoloxía atropao toos estos años, son, de fechu, cuatro mazos distintos los qu’anuncien de la serie, toos ellos de cien cartes. Ún, Timey-Wimey, basáu nos personaxes y les hestories del novenu, el décimu y l’oncenu Doctor (quiciabes los que gocien de mayor popularidá, pos foron los que traxeron la serie de vuelta nos años 2000). Otru, Masters of Evil, va tar centráu na amplia galería de villanos de la serie, como los Daleks o los Cybermen. Blast from the Past sedrá’l mazu dedicáu a la serie y la película clásiques (y los sos ocho Doctores), y Paradox Power a los dos más nuevos.
Pal añu viniente, Wizards of the Coast tien pensao sacar tamién espansiones de los videoxuegos Final Fantasy y Assassin’s Creed. Dexámosvos darréu delles imáxenes promocionales d’esta espansión, de la que planien la salida pal trece d’ochobre.
