Tamos yá fechos a les deconstrucciones d’hestories clásiques. Per un llau, quiciabes porque pal mercáu son más llamaderes que les dafechu orixinales. Per otru, porque permiten dar una visión nueva a elementos clásicos, recombinándolos de manera divertida. Por embargu, dacuando son deconstrucciones tan ablucantes que nos siguen dexando plasmaos.
Esti ye’l casu de la película nueva que va sacar Netflix esti catorce de setiembre, y que se titula Once Upon a Crime (sí, xugando col “once upon a time“, n’asturianu “allá una vegada”). Yūichi Fukuda, direutor renomáu de, ente otres munches películes, los live actions de Gintama y de les estravagantes Hentai Kamen (sobre un superhéroe que s’amazcara con unes bragues), trainos esta llocura na que se fusionen los cuentos de fades y les hestories de misteriu.
Nella, les idols Hashimoto Kanna y Araki Yūko faen respeutivamente de Caperuchina Colorada y Cenicienta, dos moces a les que se-yos tuerce lo de dir al baille en castiellu cuando arrollen a un puntu col carruaxe de calabaza. Lo asocedío nun ye tampoco lo que paez, y la cosa complícase más tovía cuando detienen al príncipe por ello. Asina, Caperuchina va tener d’utilizar les sos habilidaes deductives pa descubrir qué ye lo qu’asocedió daveres.
Esta llocurona d’argumentu ta, como nun podía ser d’otra manera, basada nun manga, Mukashi Mukashi Aru Tokoro ni, Shitai ga Arimashita d’Aoyagi Aito, anque tamién paez trayer novedaes importantes.
Por si nun vos aguantáis a ver la pinta que tien, dexámosvos l’enllaz al avance calcando equí.
