Güei tenemos una escoyeta de cinco series que paga la pena ver y tienen en común tar basaes en llibros de ciencia ficción y fantasía. Nun vamos recomendavos Xuegu de Tronos (y más cola última temporada), y muncho menos el desastre d’Artemis Fowl (val, ye una película).
Sangre y güesu
La serie de Sangre y güesu ye l’adautación de la novela homónima de Leigh Bardugo y ta acabante d’asoleyase en Netflix. La serie encaxa nel xéneru fantásticu, y asítianos nun mundu que ta dividíu a la metá por una sombra que foi conxurada años enantes por un Grisha (una especie de magu) que controlaba la escuridá y que va poder contrarestar, secundies una profecía, una Grisha que va controlar la lluz. Estos Grisha tuvieron persiguíos durante años y son casi que usaos como armes pol so país.
La serie cúntanos la historia d’Alina, la Grisha que pue controlar la lluz, y al empar que vamos descubriendo los sos poderes vamos descubriendo cómo s’organiza esi mundu y los peligros a los que ta espuesta porque non tol mundu quier que desapaeza la sombra y dalgunos quieren aprovechase d’ella.
La serie entemez delles estétiques, ente ella la steampunk, con un vestuariu y escenarios abondo curiaos y unos personaxes de toa mena que faen qu’esta serie sía abondo entretenía y una bona adautación del llibru orixinal, que tamién vos camentamos lleer.
La materia escura (HBO)
Esta serie ye una adautación de la triloxía de La materia escura de Phillip Pullman. Anguaño tien dos temporaes (que correspuenden a los dos primeros llibros de la saga) y tán faciendo una tercera temporada final.
La historia, d’entamu, asitianos nun mundu que ye como una copia del nuestru nel que los humanos tienen un daimonion, una especie de materialización del alma en forma de distintos animales según la personalidá y que toma la so forma definitiva na adolescencia. Nesti mundu ye onde vive Lyra, una güérfana aparentemente normal, qu’almira al so tíu Lord Asriel, un investigador y científicu.
Cuando secuestren al so meyor amigu y marcha a buscalu. Esti secuestru ta venceyáu al estudiu del polvu, un elementu máxicu que da poderes a les bruxes y paez que ye lo que fai cambiar y materializase a los daimonion, y que dalgunos quieren saber controlar pa los sos propios fines y que ta rellacionáu cola esistencia d’otros mundos.
La serie ye una allegría pa los que yá conocíen les noveles, porque hebo va unos años una adautación a película nomada La brúxula dorada que val más nin ver.
Dirk Gently: axente d’investigaciones holístiques
Abondo distinta a les anteriores y ambientada nel nuesu planeta na so mayor parte, esta serie ye abondo prestosa y entemez la realidá con elementos fantásticos. Ta basada nos llibros de Douglas Adams, que se llamen igual.
Na serie atopamos a Dirk Gently, un investigador holísticu, que cree que too ta interconeutao nel universu y que se guía pa resolver los casos según lu lleve’l destín. Ye nuna d’estes investigaciones onde crucia’l camín con Todd Broztmann (interpretáu por Elijah Wood), un rapaz normal que se ve metíu en tolos enguedeyos de Dirk, que tamién impliquen atopase y en dellos casos enfrentase a xente con capacidaes abondo especiales. Todd va acabar siendo l’ayudante d’esti investigador.
La serie tien dos temporaes y ta disponible en Netflix. Sicasí, la tercer temporada al final nun se va facer, pero esto nun quita que se puedan ver les dos primeres ensin problema.
Altered Carbon
Carbono alteráu ye una serie de ciencia ficción con estética enforma cyberpunk, pero lo que nos cunta ye digno de novela negra. La serie estrenóse en xineru de 2018, y si daqué podemos destacar nella ye lo trabayaos que tán tolos entornos qu’apaecen y la so estética, que nun quita que sía una serie perinsteresante y bien estructurada.
La serie asítianos en 2834, nuna realidá abondo distópica, con viaxes interplanetarios y na que’l ser humanu ye capaz a sobrevivir a la muerte orgánica del cuerpu y trespasar la conciencia d’un cuerpu a otru con una ficha que se mete nel cuellu. Ye nesta realidá onde nos presenten a Takeshi Kovacs, que ye insertáu nun nuevu cuerpu dempués de 250 años, pa que investigue un aparente suicidiu en Bay City.
Esta serie ta basada na novela homónima de Richard K. Morgan, qu’amás d’escribir noveles, tamién ye guionista de dellos cómics de Black Widow. Por cierto, tuvo n’Asturies como invitáu el Celsius 232.
Good Omens
Nun podíemos finar les recomendaciones ensin mentar Good Omens, basada na novela escrita a cuatro manos por Terry Pratchett y Neil Gaiman, de la que’l últimu ye amás guionista y productor.
Good Omens ye una serie de fantasía y cómica, protagonizada pol ánxel Azirafel (interpretráu por Michael Seen) y el demoniu Crowley (David Tenant). Dambos lleven siendo enemigos pola so naturaleza dende la creación (dafechu Crowley ye la serpiente d’Eva), pero a la fin, colos sieglos, son amigos. Los protagonistes tienen qu’evitar que se desendolque l’apocalipsis cola llegada del fíu de satán.
La serie, que tien 6 episodios, tuvo mui bona acoyida y ye una serie con un final enforma zarráu. Sicasí, Neil Gaiman faló de la posibilidá de facer una segunda parte.
Y hasta equí lleguen les recomendaciones de güei, esperamos que vos presten y que vos animen a lleer les noveles nes que tán basaes.
