Llectores que teníen comprao versiones electróniques de la editorial Puffin Books, la que foi centru de la polémica va unes selmanes por modificar los testos de Roald Dahl pa facelos políticamente correutos (contámosvoslo equí) denuncien agora qu’al prender los ebooks atopen que Kindle cambióles poles nueves “actualizaes”. Asina, quien comprara estes versiones pierde la posibilidá de lleer los testos orixinales colos que se fizo de manera llegal y pagando drechos.
Nun son poques les voces que salten a la contra d’esta intromisión na propiedá privada del cliente, y dalgunos como’l famosu programador y inversor Paul Graham sentencia qu’ello ye prueba de que, col modelu electrónicu, les compañes controlen y reescriben al momentu lo que pues y nun pues lleer.
Esta clas de polémiques esiste de va tiempu, probablemente desque Amazon borró de los ebooks, yá nel 2009, les copies de 1984 y Animal Farm que los usuarios “compraren”. Y tamién se repitió dende entós con otres compañes y platafomes como Comixology o Apple Store. Asina, nun pue falase de qu’estos productos electrónicos se merquen daveres, sinón que se fai una especie d’alquiler pa un tiempu ensin definir y que la empresa pue revocar o alteriar el so conteníu cuándo-y pete, ensin preguntar primero al cliente o siquiera avisalu.
