Esistíen rumores de que Netflix tamién acababa con Cobra Kai, amestándose esto a tola polémica por quitar les cuentes compartíes y terminar con otres series como Warrior Nun o 1899. P’aselalos, el creador de la serie John Hurtwiz salió ayeri en redes p’aclariar que nun ye asina, que si la serie va acabar cola próxima temporada ye porque asina queríen él y los demás implicaos. “Siempre quiximos terminar la serie nos nuesos términos y tamos agradecíos de tener la oportunidá de facelo”, dixo. Asina, que la sesta temporada seya la última ye porque asina lo teníen plantegao dende’l principiu. Anque, amiesta, “esto nun significa que terminemos col Miyagiversu”, refiriéndose claro a que tienen en mente producir dalguna pondera más de Karate Kid.
Cobra Kai ñació como continuación de la saga de películes Karate Kid, na qu’un guaḥe al qu’asedien, Daniel Larusso, depriende kárate d’un gran maestru (Miyagi, d’ehí’l nome Miyagiverse). La última película ye de yá cuasi trenta años, y yá nun la protagonizaba’l mesmu personaxe, pero en 2018 volvieron con esta serie que cuenta colos actores orixinales, y que nos muestra, nun principiu, el puntu de vista del que yera’l malu de la primer película, Johnny Lawrence, pal que’l malu fora’l protagonista. Esta idea surdió, en verdá, d’un episodiu de la comedia How I Met Your Mother, na que’l personaxe Barney Stinson declara que pa él el bonu de la película yera Lawrence.
Ah, l’avance soleyáu de la sesta temporada de Cobra Kai nun tien imáxenes de la temporada nueva, pero si queréis que vos vayan entrando ganes podéis calcar equí.
