Na cuarta temporada, que terminaba con otru tornéu más, daba la impresión de que la serie de karateques por antonomasia empezaba a mostrar nicios d’agotamientu. Siguía prestando, claro, pero la cosa paecía tar repitiéndose por demás: adolescentes que pasen d’un bandu a otru, paisanos que se miren torcío y, cuando paez que van resolver les coses, l’apaición d’un malu más malu que pon de nueves too pates p’arriba. Conque averéme a la quinta temporada, he dicir, con rocea, col mieu a qu’una serie tan xenial fora decayendo por nun la terminar primero de gastase. Nun podía tar más equivocáu.
La quinta temporada empieza no más asemeyao que podríen facer a una distopía. La escuela d’artes marciales qu’usa l’odiu como fuercia espárdese a los sos deleres pel valle, abriendo dojos nuevos y comprando los otros que yá había; nun queda yá naide que seya a aparalos. Por suerte, mientres Johnny Lawrence fai un viaxe col fíu a México, que nos trai a la cabeza’l viaxe de Migayi y LaRusso en Karate Kid 2, el que fora’l malu d’ella, Chozen, va ayudar a LaRusso a acabar cola amenaza. Ye un aciertu, la verdá, facer d’esti un personaxe recurrente, orixinal y interesante, que xunce la sabiduría oriental típica del xéneru col matonismu de so orixe de sicariu. Y asina, los trés karateques adultos van enfrentase, más en serio que nunca y con aliaos inesperaos, a la perversura y megalomanía de Silver. Y masque les situaciones bien series nun faltaron en temporaes anteriores, surdiendo auténtiques guerres de bandes nel apocayá pacíficu valle, les coses tomen otra dimensión dafechu mayor cuando los adultos garren les armes blanques. De fechu, tamién más series qu’en cualesquiera de les películes pasaes.
Asina, la serie muestra ser a anovase dando otra vueltina de tuerca, y solo queda ver si consigue siguir faciéndolo’l tiempu que dure… Porque, la verdá, l’ésitu y lo contentos que deben tar los actores por esti faen albidrar que la cosa nun tien pinta d’acabar yá.
