L’otru día (equí) contábemosvos l’ésitu que ta teniendo Cocaine Bear (en castellano, Oso vicioso), una película d’Elizabeth Banks que tien como argumentu exautamente lo que paez y que, de manera sorpresiva, anda cerca de facer solombra a la última película de Marvel.
Contábemosvos, tamién, que la noticia de qu’atoparen un gran alixu de cocaína na mar llevó a popularizar nes redes la idea d’una Cocaine Shark, hasta’l puntu de que preguntaron a Elizabeth Banks nuna entrevista si taría dispuesta a dirixila, y ella respondió que-y podría prestar enforma. Por embargu, yá se-y adelantraron, y ye que’l nome yera mui apetecederu pa nun lo rexistrar.
Wild Eye Releasing, una productora de películes de baxísimu presupuestu, ente les que s’alcuentren unos cuantos mockbusters como The Punished, Paranormal Captivity o The Amazing Bulk, y que yá ye esperta en películes de tiburones llocos como Sharkenstein, Shark Exorcist o Sharkula, acaba sacar un avance d’una película con tal títulu. Podéis velu equí, pero ye terrible y amás fai plantegase una cosa: ¿ye exautamente lo que vienden, o hai dalgún trucu?
Y ye que la noticia de la que vien la broma tien como mes y mediu, y por mui de baxu presupuestu que seya la película, sorprendería que tuvieren un avance tan pronto. Amás, ¿qué tien que ver el tiburón-bugre que sal con un tiburón cocainómanu? ¿Qué tien que ver siquiera la portada colo que presenten n’interior? Da la impresión de qu’aprovechen una película que yá taben faciendo, a la que-y meterán dalguna escena con narcotraficantes pa xustificase. Dalgo asemeyao pasó con aquella de Corona Zombies, namás empezar el confinamientu, y que yera una película vieya doblada pa facer comedia, y con unes cuantes escenes nueves metíes pel mediu.
Lo que ta claro ye qu’ente l’ésitu de la película orixinal, l’otru mockbuster que ta preparando The Asylum, Attack of the Meth Gator, y agora esta, abulta que la moda de los monstruos drogaos namás acaba d’empezar.
