Mañana vienres entama la CometCon, ún de los festivales friquis de más importancia n’Asturies xunto col Celsius 232. La organización yá asoleyó’l programa completu d’actividaes d’un festival qu’intenta tocar tolos palos posibles: dende lliteratura a rol pasando pelos videoxuegos, los xuegos de mesa y los youtubers. El vienres 3 va poder xugase a bien de xuegos nel pabellón correspondiente a lo llargo de tol día, tamién van facese torneos del FIFA y del CS:GO. Nes charres vamos tener una gran variedá: charres de lliteratura como la de “Los magos de la luz blanca” a otres sobre cómo imprentar pieces en 3D, dibuxar cómics como en Marvel o un taller de varines máxiques. Amás, como colos videoxuegos, va poder xugase a dellos xuegos de mesa a lo llargo de tol día como son Time´s up, Codigo secreto, Pitchcar, Sushi Go, Colonos de Catán, Carcassonne y X Wing. Tamién va haber talleres y combates d’esgrima antigua a lo llargo de tol día y de los díes siguientes.
El sábadu’l programa cambia. Va haber charres como una sobre cómo montar la to propia secta (sic), otres sobre qué ye ser YouTuber, talleres d’ilustraciones en posavasos, de creación 3D de muñecos o d’efeutos especiales nel maquillaxe. Les lletres asturianes tamién tienen el so güecu’l sábadu de la mano de la editorial Ediciones Radagast que propón una charra-alderique col públicu sobre les lletres asturianes y el rol de la ficción especulativa nella (terror, ucroníes, fantasía y ciencia ficción) nel que tarán presentes dellos de los autores mozos más representativos del xéneru. Esi mesmu día va haber charres de concept art y animación de videoxuegos, talleres sobre herboloxía y torneos de Fortnite y Tekken 7.
Pa rematar el festival, el domingu 5 habrá dellos talleres de marcapáxines, ganchillo, de modeláu interautivu amás de concursos de cosplay, charres sobre cómics, Tolkien y les sos rellaciones cola edá media o Dragon Ball. Los xuegos de rol y videxuegos asturianos van tar presentes de la mano de Depués d’Ochobre, que va organizar delles partíes y de la presentación del videoxuegu “Tiempu de Lleendes” que desendolca Adrián Carbayales, ún de los collaboradores de la nuesa web. Proyeutu esti últimu del que faláremos equí.
