En xunetu falábemos del Metrópoli Fest, que se repartió en distintos espacios de Xixón, y que supunxo un preludiu d’otra convención que taba por tornar: la Cometcon. Magar que pudimos esfrutar d’una Cometcon al entamu de setiembre del añu caberu con una distribución repartía per dellos espacios de Xixón, toos tábemos naguando por una Cometcon asemeyada a la que se facía n’Uviéu antes del coronavirus, y podemos dicir qu’esta nun defraudó (y dafechu yera enforma más grande).
La Cometcon 2021 fízose nel Recintu Ferial Lluis Adaro de Xixón el 3, 4 y 5 de setiembre. Yá vos adelantamos parte del programa d’actividaes que diba haber (y delles n’asturianu), pero güei venimos a falavos del ambiente y como foi viviles en primer persona.
La convención tuvo más de 20000 asistentes, y dafechu enllenó’l so aforu a delles hores el sábadu y el domingu y agotó les entraes. Foi tou un ésitu, notóse que la xente tenía ganes yá del retornu de la Cometcon. La organización controló l’aforu de caún de los pabellones y punxo y había xel hidroalcohólicu nes entraes y per dientro del recintu. Amás, l’embozu yera obligatoriu en tol recintu.
La Cometcon distribuyóse en cinco pabellones y les zones esteriores del recintu, onde tamién podíemos atopar dellos puestos de comida y bébora y una zona de karts. Había una montonera de puestos que ver, ente los que taba la zona d’artistes, onde se podíen mercar direutamente ilustraciones y merchandising fecho por artistes y artesanos de distintos sitios d’España. Había amás delles esposiciones, na qu’hai que destacar la de Star Wars, que taba acompañada pola Orden 66, l’Escuadrón X-Wing d’Asturies, la Orde de Reva, la Lexón 501 y el Mandalorian Mercs. Amás, al llau d’esta había una zona de k-pop organizada por K-pop Asgaya.
Na planta d’arriba del Pabellón d’Esposiciones había una zona de talleres y el restu yera la zona de xuegos de mesa, onde ente otros xuegos, presentóse y hebo partíes de Depués d’Ochobre y tamién se pudo prebar el videoxuegu n’asturianu Tiempu de lleendes. Sicasí, estes nun fueron les úniques actividaes venceyaes a la llingua asturiana, tamién hubo una charra’l sábadu pela tarde de Ficción Especulativa y Lliteratura Asturiana, na que participaron los autores Víctor Suárez, Blanca Fernández, Aymara González, Andrés Fernández y Nicolás Bardio.
Les conferencies y concursos ficiéronse nel Salón d’Actos. El vienres foi’l Cometcon Talent, nel qu’amás dieron un conciertu el dúu d’idols asturianes Dhalia. Nel mesmu escenariu, pero de domingu, fízose el concursu de baille Dance Arena.
Tamién nel Salón d’Actos foi onde se ficieron los dos concursos de cosplay: el Cosplay Stage de sábadu y la Pasarela de Cosplay de domingu. Presentaos dambos por Askal Cosplay, tanto en cantidá como en calidá de los participantes foi ablucante (más d’un añu ensin concursos da pa muncho). El xuráu, formáu por Kakiku Cosplay, Ira Malonne, Dids Rainfall, Darka Studio y BMZ Studio túvolo difícil. Amás, dambos concursos enllenaron l’auditoriu y tuvieron qu’abrir les zones de palcos. Amás, había munchísimos cosplayers, dellos bien mozos, qu’amuesen l’espoxigue d’esta afición.
Ún de los pesos fuertes d’esti añu yeren los invitaos creadores de conteníu, munchos d’ellos divulgadores, como La Hiperactina, Helanyah, El Cubil de Peter, Historias de la historia y Quantum Fracture, que participaron en delles charres y alcuentros. Tampoco nun podemos dexar de mentar a Lolulogio, artista y creador de conteníu en distintos ámbitos que yá ye un habitual de la Cometcon.
Los aficionaos a los videoxuegos tuvieron tol día la oportunidá de xugar durante los tres díes nuna de les zones del Pabellón Central y nel Pabellón de PCBOX. Hubo torneos de Dragon Ball, VALORANT, Tekken 7, Fortnite, FIFA 21 y CS:GO. Hebo tamién charres sobre videoxuegos, delles perinteresantes como la de Mama, quiero ser desarrolladora e videoxuegos, que dio l’asturiana Laura González Fernández.
Amás de too esto, tamién había una zona d’esgrima, con talleres pa neños y adultos y demostraciones tolos díes, coordinada por la Asociación Asturiana d’Esgrima Antigua.
Esti añu apostaron por poner los cartelos distribuíos pel recintu n’asturianu, fechu que ye d’agradecer como ferramienta de normalización del usu de la llingua asturiana. Hai que dicir que la convención yá lleva delles ediciones apostando pol usu del asturianu nes sos publicaciones y nes actividaes, y esti ye un pasu más.
Agora yá solo nos queda cuntar díes pa que llegue la Cometcon 2022.
