Command & Conquer nun precisa de nengún tipu de presentación pente los xugadores a los xuegos d’estratexa. El xuegu, que depués acabo por da-y nome a la franquicia, nacíu en 1995 marcó una dómina y supunxo en gran midida l’afitar les bases de lo que foi’l xuegu d’estratexa en tiempu real de los 90: Facer grupos d’unidaes arrastrando’l mur, coyer recursos cola acollechadora, una variedá d’unidaes que funcionaríen un poco col prisma “piedra-papel-tisoria”, na que les d’un tipu yeren bones pa una cosa y les d’otru pa otra. Y una serie d’escenarios y misiones creativa. Pero si amás de la xugabilidá dalgo pasó a la Historia de too aquello, esi dalgo foi la fondura de la filaza, les actuaciones impecables de tolos actores que fixeron les escenes intermedies ente unes y otres misiones, y el cómo eses misiones diben adautándose a la hestoria que mos ponía nel pelleyu d’un xeneral de la Iniciativa de Defensa Global (GDI) o de la Hermandá de Nod (NOD).
El primer Command & Conquer, el de 1995, al que más sero llamaron “Tiberian Dawn”, cuenta la hestoria de qué pasaría nun futuru propiu (que’l xuegu asitiaba a finales de los 90) si un meteoritu cayía nel ríu Tiber, n’Italia y como consecuencia d’ello formábase un material peligrosu pa la salú humana pero munchu más útil y valiosu que’l petroleu. Énte esti fechu, surden dos grupos militares de poder, d’una banda la GDI (una xunión baxo’l paragües de la ONU, entamada polos países más ricos del mundu) y d’otra la Hermandá de NOD (una especie de rede de redes terroristes mundiales baxo la direición del carismáticu cabezaleru Kane). A lo llargo d’una dolcena de misiones, el xugador puede facer dos campañes: la de la GDI n’Europa o la de Nod n’África. El tipu d’armes y unidaes son, en gran midida, unidaes reales de la dómina como’l tanque M1A1 o’l Hummer, pero con un daqué de ciencia ficción próxima como’l tanque mamut o l’avión de despegue vertical ORCA.
Una de les carauterístiques más llamaderes que tien la remasterización, ye que con namás calcar la barra espaciadora, déxanos ver el xuegu colos gráficos de 1995 o colos actuales. De mou y manera que los que seyan totalmente señardosos de la dómina, van poder sentise que tán de vuelta nos 90 y xugar como si’l tiempu nun pasare pel clásicu. Y ye que, en verdá, nun pasó. La remasterización afeuta namás al xuegu – non a los videos intermedios – y fai que tenga la mesma xugabilidá que tenía daquella.
La bona noticia ye que Command & Conquer nun vien solu col “Tiberian Dawn” y toles sos espansiones y misiones tanto de PC como de videoconsola – lo que nun ye poca cosa – sinón que vien, tamién, de la mano de la secuela ucrónica Red Alert, un xuegu asemeyáu que ta basáu nuna realidá alternativa na qu’Einstein construi una máquina del tiempu, viaxa a l’Alemañana de los años 20, mata a Hitler y provoca… … la segunda guerra mundial pero ente la OTAN y el Pautu de Varsovia, con Stalin a la cabeza de les tropes roxes.
