Col primer xuegu de rol asturianu Depués d’Ochobre llegando a cases y llibreríes y la temática de la Guerra Fría d’actualidá, en Refuelgu paeznos interesante afondar nel aspeutu científicu que tuvo esta dómina y, dientro d’él, nel más sobresaliente de toos: La carrera espacial.
La Carrera Espacial foi l’esfuerzu de les dos grandes superpotencies de la dómina, la URSS y los Estaos Xuníos, por conocer, esplorar y controlar l’espaciu esterior y anque formalmente la carrera entama nos años 50, l’orixe hai que buscalu na Alemañana Nazi, onde vivía y trabayaba’l científicu Wernher Von Braun. Na Segunda Guerra Mundial, Von Braun dirixe la construición del V-2, el primer misil balísticu fechu pol ser humanu y, tamién, el primer oxetu que facía un vuelu suborbital; esto ye, n’abandonar l’atmósfera.
Operaciones Paperclip y Osoaviakhim
Esta clase de cohetes fixérense col envís de bombardiar Inglaterra y Bélxica, y llegaron a producise en grandes númberos. Sicasí, cola derrota de l’Alemaña Nazi, esti proyeutu acabó. Foi entós cuando los americanos y los soviéticos quixeron facese col mayor númberu de científicos alemanes del derrotáu III Reich. Pa consiguilo, fixeron les operaciones Paperclip (EEXX) y Osoaviakhim (URSS), per aciu de les que consiguieron tresportar a los sos países más de 2000 científicos alemanes caun de les dos superpotencies.
Gracies a estes operaciones, xente como’l propiu Von Braun acabó asumiendo posiciones perimportantes, como la de ser el xefe de diseñu del Cohete Saturn V que sedría’l que llevaría a les misiones Apolo a la Lluna.
L’añu xeofísicu internacional y los primeros satélites
1957 declárase l’añu xeofísicu internacional y les dos superpotencies anuncien que tienen la intención d’unviar satélites artificiales al espaciu. D’esti mou, la URSS conviértese nel primer país en llanzar un satélite al espaciu, trátase del Sputnik I; satélite que dexó espresiones na fala popular (que nun recueye’l DALLA) como “Va como un espuni”.
Y en verdá sí que diba rápido, pos el satélite d’83 quilos desplazábase a 29.000 quilómetros per hora, o, lo que ye lo mesmo, 8 quilómetros per segundu.
A esti satélite siguiéronlu otros satélites soviéticos y tamién el primeru americanu, l’Explorer 1. Qu’anque dalgo más tarde, llegaron temprano tamién.
Depués d’estos primeros satélites, hebo un esporpolle de los satélits en xeneral. Primero d’acabar la década mandárense yá satélites de comunicaciones y cada vuelta diben recoyendo más información.
Animales nel espaciu
El siguiente pasu de la carrera espacial foi’l colocar nel espaciu animales de toa triba: Hebo rates, monos, perros, tortugues, xaronques.
Pente ellos, los más conocíos foron la perra soviética Laika, que foi’l primer ser vivu n’orbitar alredor de la tierra (otra vuelta ganaben los soviéticos). Anque nun foi l’únicu animal en volar en cohete. Primero qu’ella, los alemanes mandaron mosques de la fruta nuna cápsula nun V2 pa comprobar los efeutos de la radiación (y sobrevivieron) y tamién esnalaron nun cohete americanu dellos mures en 1953 y munchos otros, como Miss Baker, el monu-esguil de Perú que se llanzó al espaciu y sobrevivió al vuelu.
Yuri Gagarin y los primeros vuelos tripulaos
Esta dómina d’unvios d’animales, foi la que fai posible (Como con una vacuna) l’abrir el terrén pa la presencia de seres humanos nel espaciu. D’esta manera, Yuri Gagarin conviértese nel primer cosmonauta n’aportar al espaciu. Failo dientro del Vostok 1 y el mundu mirábalu con mieu, pos tiempu atrás estrellárese la Soyuz-1 produciendo la muerte del tripulante; misión pa la que fore tripulación de repuestu.
Yuri Gagarín, como consecuencia del vuelu nel qu’orbitó la tierra, convirtióse nuna figura internacional y dio bien de conferencies per tol planeta. Amás, na URSS, nomáronlu Héroe de la Unión Soviética, la mayor condecoración qu’hai.
La llegada a la lluna
La llegada a la lluna ye otru gran momentu na carrera espacial. Nesti casu – y per primer vez – los americanos son los primeros en llegar. Lo que sí llama l’atención nesti casu ye que los soviéticos nun faigan por dir depués. El 20 de Xunetu de 1969, hora de Houston, el módulu d’allunizax posábase na Lluna, na zona del Mar de la tranquilidá que s’escoyere pa ello.
Depués, los astronautes fadríen ellí una serie d’esperimentos y midiciones y quedaron na lluna poco más de 20 hores. Depués, volvieron a metese nel módulu llunar y volvieron a la órbita de la lluna onde taba’l módulu de mandu y el de serviciu al mandu del tercer home de la misión, que nun tocaría la lluna.
Les estaciones espaciales
Pa munchos la carrera espacial acabaría ellí. En realidá, los más interesaos nesa visión son los americanos, que se víen a sigo mesmos como “ganadores” d’aquella competición (magar que toles otres coses que se fixeren primero, fore la URSS la primera en llegar). Sicasí, depués del aterrizax na lluna, hebo otres misiones (siguió habiendo viaxes a la lluna per parte d’EEXX), y tamién, la creación d’estaciones espaciales.
La Salyut ye la primer estación espacial que se monta. Tuvo operativa de 1971 a 1986 y fíxola la URSS. Tratábase d’una estación monolítica (una sola pieza), depués fixérense otres estaciones militares como la Salyut 3. Supónse que l’oxetivu que teníen – revelóse perpoca información d’elles – yera’l de conocer los movimientos de tropes y fotografiar los exércitos, bases y instalaciones científiques na tierra.
Los americanos nun llegaríen equí hasta 1973 col so Skylab. D’entós p’acá, fixérense otru tipu d’estaciones espaciales de les que la más importante y carauterística ye la Mir. Trátase d’estaciones espaciales modulares, esto ye, que puen dir faciéndose poco a poco y llevando en cada viaxe un cuartu o dependencia más.
La cooperación internacional anguaño
Anguaño yá nun queda nenguna de les estaciones espaciales de la Guerra Fría y la única que queda en pie ye la Estación Espacial Internacional, que ye’l productu del alcuerdu y la cooperación de delles axencies espaciales (práuticamente de toes) y que tien unes dimensiones muncho mayores que les de les precedentes.
