¿Cómo se ve Asturies dende l’aire nel Flight Simulator 2020?

Respuesta curtia: Igual que na vida real.

Respuesta llarga: esti artículu.

A mediaos del pasáu mes d’agostu salía’l Flight Simulator 2020, un simulador de vuelu de Microsoft que llevaba la saga a otru nivel. Depués de 13 años dende la salida del anterior: El Flight Simulator X (FSX); aprovecía yá una nueva entrega.

Sicasí, lo esperao d’esti títulu tenía menos que ver coles dinámiques propies d’un simulador aéreu (El FSX yera yá enforma bonu y servía como software d’entrenamientu a pilotos) como col fechu de la revolución gráfica qu’implicaba facer un xuegu d’estes carauterístiques. Y ye que’l Flight Simulator 2020 tien l’ambición de ser un xuegu que reproduza fielmente la totalidá del planeta. ¿Qué quier dicir esto? Que val con poner unes coordenaes y l’avión va tar nel llugar que queramos nel momentu del día que queramos col tiempu que queramos. Esto implica dende poder ver la ñeve na Antártida, hasta ver la Torre Eiffel o la Ponte de Brooklyn pasando, como ye obvio, pelos Picos d’Europa o’l propiu aeropuertu d’Asturies.

Como ye obvio, modelizar un mundu d’estes carauterístiques (del mesmu tamañu que’l nuesu planeta) llevaría les vides de munchísimos progamadores y yera imposible de nun ser pola ayuda de la intelixencia artifical que fixo posible convertir les imáxenes de Google Maps nun videoxuegu.

Una revolución gráfica.

La revolución gráfica y el nivel de detalle del FS2020 ye talu que ye posible – y nun ye una esaxeración, pos ye fácilmente comprobable – buscar la to propia casa nel xuegu. Tanto si vivimos nun bloque de pisos como si vivimos nuna casa unifamiliar, si se ve dende’l satélite del Google Maps, lo más probable ye que podamos ser a vela dende’l Flight Simulator 2020.

Obviamente, ta claro, les cases y edificios nun son perfeutes. En munches ocasiones la propia IA tien que desendolcar imáxenes en 3D a partir d’otres en 2D y podemos atopar edificios que son más altos de lo normal (o más baxos) o que tienen formes distintes – un casu, por exemplu, ye’l de la Xunta Xeneral, que tien un techu con forma cuadrada, que nun se correspuende col real.

Pero lo cierto ye que los pueblos y ciudaes d’Asturies y del restu del mundu “tán ehí” d’una forma mui asemeyada a como podemos velos nel Google Maps.

Amás, los desarrolladores quixeron representar una ventena-trentena (acordies colo caro-barato de les trés versiones) d’aeropuertos con un mayor nivel de detalle. Ehí sí qu’hebo un trabayu de modelizao “a mano” pa facer que cobraren vida y foren iguales dafechu los aeropuertos o más transitaos del planeta o con un mayor nivel de dificultá (como St Marteen nel Caribe o la islla de Madeira).

Asturies nel FS2020

Obviamente, l’Aeropuertu d’Asturies nun ta pente los trenta más importantes del mundu nin en términos de pasaxeros nin en términos de dificultá. Nun fai falta habilitación especial pa qu’un pilotu de llinia aterrice un airbus en Ranón nin, tampoco, ye Asturies un país con muncha población. Poro, tanto’l nuesu aeropuertu como’l restu d’aeródromos (básicamente dos: La Curiscada y Llamorgal) tán representaos nel xuegu y foron xeneraos de mou automáticu en base a les informaciones de Google Maps.

¿Pero qué pinta tienen? En Refuelgu! pudimos probar el xuegu y equí fiximos unos pocos vídeos pa que podáis almirar Asturies dende l’aire. Si volastis dalguna vez al Aeropuertu, vais poder ver la perspeutiva que tienen los pilotos… Anque como vais ver, pasamos de pidir permisu p’aterrizar.

Realismu total:

Y ye qu’en Flight Simulator 2020 nun son namás realistes les físiques que gobiernen los aviones, les velocidaes d’entrada en pérdida, l’estrés estructural o la facilidá y manera na que respueden los controles (Nun ye igual pilotar una avioneta qu’un avión de llinia y eso nótase). Tamién ye realista’l sistema de control de tráficu aereu y la posibilidá de facer aterrizaxes instrumentales (ILS) o de poner el pilotu automáticu.

D’esti mou, podemos facer planes de vuelu realistes, y dir recibiendo les instrucciones de la Torre de Control d’un aeropuertu o d’otru, d’un llau a otru del mundu y dir faciendo escala pa repostar o lo que seya.

Nesi realismu, otra de les coses qu’integra FS2020 ye’l poder emplegar el tráficu aéreu real y la meteoroloxía en tiempu real. Esto ye, que si son les 18h00 n’Asturies, podemos xugar en Nueva York a la hora llocal y col tiempu llocal qu’heba ellí (col vientu qu’hai esi día, les lluvies o’l ñublu). Tamién, como ye obvio, podemos poner el clima como mos pete. De fechu, una de les coses qu’inclui el xuegu son una serie de retos como pue ser, por casu, aterrizar en Xibraltar con vientu cruzáu.

Amás, como n’otres ediciones anteriores, hai tola posibilidá de configurar averíes en vuelu como son, por exemplu, una despresurización de la cabina, un fallu nun motor o un incendiu. Too esto pa poder enfrentase a situaciones pa les que los pilotos profesionales se preparen.