Los OENI (Oxetu Esnalador Non Identificáu) tienen yá una “disciplina” que s’encarga del so estudiu. Trátase de la “ufoloxía” (de les sigles d’OENI n’inglés UFO) y los más entusiastes d’esta rama del conocimientu que va dende lo folclórico hasta lo más serio tán de norabona porque lo que fixo l’Armada de los Estaos Xuníos nun foi más que dar calter oficial a la esistencia d’OENIs. Y ye que’l Departamentu de Defensa de los Estaos Uníos acaba de lliberar trés vídeos nos que se puen ver OENIs y ye la primer vez que se-yos da calter oficial a esti fenómenu.
Los vídeos qu’asoleyó l’Armada americana pueden vese equí. Colos nomes (“FLIR.mp4”, “GOFAST.wmv” y “GIMBAL.wmv”) y amuesen una serie d’oxetos non idenfiticaos desplazándose a muncha velocidá. Los videos tán grabaos dende caces de l’Armada Americana nes costes de California en 2004. Depués d’una presión de periodistes qu’investigaron esti socesu, l’Armada acabó por facer públicu’l videu y qu’investigaren cuáles son les razones que llevaron a qu’asocediere esto.
OENI y Estraterrestres
Cuando se fala d’un OENI, no primero no que se suel pensar ye nos estraterrestres. Una civilización poderosa enforma como pa venir equí y tener oxetos esnaladores que puedan comportase d’un mou estremáu a los qu’hai na tierra. Sicasí, nun ye xeneralmente la esplicación que más suel convencer a los militares. La presencia d’OENIs ye daqué que se fai más normal a lo llargo de la Guerra Fría. Munchos d’estos OENI son, cenciellamente, aviones de los que nun se conocía la esistencia, aviones esperimentales o, n’ocasiones, aviones que s’identifica de mou incorreutu.
Hai que tener en cuenta que la Guerra Fría non solo foi una época de muncha esperimentación militar en producir y probar aviones y helicópteros cada vuelta meyores; sinón que tamién foi un momentu nel que l’espionaxe yera una prioridá nacional pa dambes superpotencies. Los aviones y satélites espíes yeren la norma y nun yera infrecuente que munchos volaren perriba’l territoriu enemigu pa sacar semeyes y saber ónde taben los puntos más estratéxicos.
¿Sedríen los estraterrestres un peligru?
Sicasí, la esistencia d’estraterrestres ye una hipótesis (tovía non demostrada) que sofita un númberu cada vuelta mayor de la comunidá internacional. Nos años 70 y sol paragües de la NASA surde la iniciativa pública “SETI” (Search fo Extra-Terrestrial Intelligence). Esta iniciativa básase nel estudiu de les señales de radio que vienen d’otros planetes y busquen identificar delles que pola so estructura puedan ser artificiales y frutu d’una intelixencia superior. Pel momentu la única que s’atopó foi la famosa “Señal Wow”, en 1977 .
Anque los vídeos de la marina seyan la primer publicación d’un vídeu d’un OENI, a los estraterrestres lleva la NASA buscándolos bien de tiempu. D’esti mou, nes sondes interplanetaries que s’unviaron fuera del sistema solar, incluyóse una montonera d’información sobre la Tierra y la especie humana. D’esti mou, nes sondes Voyager (les que más lloñe tán de la Tierra nesti momentu) púnxose una placa con una representación de los seres humanos y una serie de principios astronómicos y matemáticos básicos que, normalmente, una intelixencia superior tendría que ser pa entender.
Sicasí, hai xente pente la comunidá científica que ta mui a la escontra de dir y dici-yos a los estraterrestres ónde tamos y cómo somos. El fináu Stephen Hawking anunciaba cuáles yeren los riesgos de contautalos. Nunes declaraciones que recoyía ABC, Stephen Hawking “Atopar una civilización avanzada pue ser como cuando los nativos americanos atoparon a Colón. Aquello nun-yos salió nada bien”. Y diz que si respondemos “Podríen ser muncho más poderosos y danos el valor de les bacteries”.
La hestoria de los OENI
Los fenómenos estraños del SXVI
Anque ye nos años 40 cuando entama de verdá”, hai dellos precedentes hestóricos como’l fenómenu celeste de Nuremberg en 1561. Nesti fenómenu fálase d’oxetos llargos como una llanza prieta, d’esferes de colores estremaos que “s’engarren” en cielu. Lo que fixo que dellos acaben considerando al fenómenu de Nuremberg como una “batalla ente OENIs”. Ye interesante qu’hai bien de referencies a esti fenómenu amás d’ilustraciones y dibuxos o documentos escritos que dan cuenta d’él. Sicasí, aínda nun se-y pudo dar una esplicación. Obviamente, daquella y por mor de la mentalidá de la dómina, interpretóselo como una alvertencia de Dios pa que la xente se comportare correutamente.
Cinco años depués, en 1564 asocede un fenómenu celeste estrañu en Basilea. Ye’l Fenómenu Celeste de Basilea. El fenómenu d’esta ciudá aseméyase muncho al de Nuremberg, pero equí tien una duración de dellos díes y estremaes fases. Tamién falen de que’l Sol faise más pequeñu y hai una “guerra” ente les esferes de lluz.
Les “aeronaves misterioses”
A finales del sieglu XIX, cuando entamen a surdir los primeros globos y dirixibles (pero tovía nun esistíen los aviones) nel Oeste de los Estaos Xuníos entamen a vese una serie de “oxetos estraños“. Dellos tienen lluces y otros non, y dacuando óyense nellos voces humanes dando órdenes (como nun casu, pa evitar la torre d’un edificiu). Una investigación más fonda fecha depués, demostraría que la mayoría de les coses que se vieron foron planetes, una parte bromes y engaños y otra pequeña coses que nun se pueden desplicar. Tamién, nesta dómina, infórmase nos periódicos d’Estaos Xuníos que los pilotos “son humanos” o “paecen humanos” anque tienen maneres de comportase y d’actuar estrañes. En dalguna ocasión dalgún afirmó venir de Marte.
Anque probablemente seya d’orixe humanu, lo cierto ye que los informes d’esta dómina son de los primeros que falen (anque namás en delles ocasiones) d’un posible orixe estra-terrrestre y non divín del fenómenu. En parte lóxico, pol cambéu de la mentalidá de la época dende los sieglos precedentes.
La Guerra Fría
La primer descripción d’un OENI “como lu conocemos”, esto ye, con forma de platu o d’ensaladera vien del aviador americanu Kenneth Arnold, qu’informa de ver en Xunu de 1947 nueve oxetos con forma de galletes planes, mui rápidos y rellumandes dir pal Monte Adams, n’Oregón. D’entós p’acá la prensa quedaría colo de “Platín” pa definir esti nuevu tipu d’OENI.
Kenneth nun diba ser l’únicu n’afirmar ver esti tipu de coses; pero’l ser el primeru en dicilo tuvo la so importancia. Otru pilotu, Richard Rankin, afirmó ver coses rares primero que Kenneth pero nun falare d’ello porque pensare que yera un esperimentu de l’Armada. El 4 de xunetu una tripulación cuenta ver nueve oxetos en forma de discu qu’escolten l’avión nel cielu d’Idaho na nueche del 4 de xunetu de 1947. Esti testimoniu paez-yos más creyíble a los medios de comunicación que’l d’Arnold. Ye por eso que nos prósimos díes, los más de los periódicos cuenten en portada estes hestories.
Dende esi momentu van espoxigar los casos que se cuenten. Dellos tán claramente inventaos y busquen llamar l’atención, otros pueden ser identifiacaciones incorreutes d’aviones esperimentales, espíes o d’otra triba. Sicasí, a la NASA y a les Fuercies Aérees, los que más-yos llamen l’atención de toos son los que capturen los pilotos; pos supónse que’l so conocimientu de los oxetos esnaladores ye enforma mayor que’l de cualquier persona en tierra y, en xeneral, suelen tener una mayor credibilidá.
Les investigaciones
A lo primero, les autoridaes americanes abren investigaciones. D’esti mou, fixéronse informes sobre toes estes coses per parte de los propios Estaos Xuníos (anque nunca nun se fixeren públicos). Depués, en 1969, acabóse con toles investigaciones y caltúvose l’asuntu de los OENIs como un asuntu internu. Si les hubo, nun foron oficiales o nun foron públiques. Anque los informes de xente que vía OENIs nun apararon d’entós p’acá.
Alrodiu d’esti “secretismu” col que’l gobiernu americanu xestionó l’asuntu dende bien ceo, medró una importante cultura popular basada nos alieníxenes y na creación d’una serie de “teoríes de la conspiración” que van dende los homes de prieto (Men in Black, qu’hasta-y da títulu a una película cómica), hasta alcuentros y abduciones. Delles de les películes más icóniques del sieglu pasáu básense nesto. Les mítiques “Close Encounters of the Third Kind” (Alcuentros del tercer tipu) y “ET” son dos de les que más sonadía van tener, dende puntos mui estremaos.
La divulgación de la información
Años depués de qu’acabe la Guerra Fría, el Gobiernu de Trump dixo qu’una de les coses que diba abordar yera tol tema de los OENI y que diba desclasificar les informaciones que yá nun suponen un riesgu pa la seguridá nacional, como pasó colos vídeos colos qu’entamamos esti artículu. Nun ye la primer declaración d’un departamentu de gobiernu americanu alrodiu d’esti tema y, de xuru, tampoco nun va ser la última. Y anque la hipótesis de qu’esistan estraterrestes paez mayoritaria pente la comunidá científica, lo cierto ye que tovía nun hai confirmación oficial dala.
Los OENI n’Asturies
Asturies nun foi una esceición a la regla xeneral d’avistamientos de fenómenos estraños. Va poco La Voz de Asturias facía una esbilla de los acolumbramientos d’OENIs n’Asturies que podéis consultar equí. Hailos tan vieyos como 1898, momentu de la Lluz de Beneros. El propio redactor, que firmaba como Lauri, vio una lluz estraña mientres trabayaba, tres d’un monte y pela nueche.
Otru, y el que más concasa coles versiones de los pilotos americanos, ye’l d’un fechu que se produz en 1968 na redolada del nuevu Aeropuertu d’Asturies. Esti socesu va calificalu’l controlador aéreu como “enigma”. El cielu taba estén y l’oxetu tenía un aspeutu esféricu, con lluces que ceguñaben azul, bermeyes y verdes, y diba rápido faciendo eses pal Norte.
Los OENI na cultura popular
Los OENI inspiraron, como diximos, bien d’obres de la cultura popular que van dende películes d’alieníxenes hasta obres de ciencia ficción importantes. Tamién na lliteratura y nos videoxuegos dexaron el so posu. Y anque la lliteratura asturiana nun ye precisamente que destaque pol puxu de la ciencia ficción, sí qu’hai títulos como recuerda’l trabayu de Víctor Suárez “Ciencia Ficción n’Asturianu” (Revista de Lliteratura Asturiana nº32 ) que traten la tema de los OENI o los estraterrestes, anque cuasi siempre dende la perspeutiva de la lliteratura infantil. Trátase de L’aventura del espaciu (1990), un cuentu empobináu pa neños de 8 años nel qu’un estraterrestre del planeta Akran manda un mensaxe a la Tierra per aciu de la televisión pidiendo ayuda porque’l so planeta va colapsar ecolóxicamente L’otru títulu venceyáu a OENIs y estraterrestres ye El cuélebre y l’home del espaciu (1991) onde un home del espaciu cae a la Tierra porque la so nave quedó ensin combustible. Tamién tenemos Ñubina, les estrelles y los pirates del espaciu (2004) der Maite G. Iglesias. Un cuentu de ventiséis páxines que fala de Ñubina Traviesa que mientres charra coles estrelles, una nave espacial apaez en cielu y diendo tres d’ella lleguen a un planeta moráu. Tamién, Xaime Bon y los cinco planetes (2011) d’Enrique Carballeira Melendi ye una continuación de Les aventures de Xaime Bon: detective galácticu (1995) onde nun hai OENIs pero’l protagonista, Xaime Bon, va conociendo estraterrestres. Otru títulu d’Enrique Carballeira que mos lleva a los estraterrestres ye Obdulio busca aventures (2001), onde un monstruu d’otru planeta quier ser esplorador integalácticu.
En realidá, una de les coses que llamen l’atención ye que, precisamente, en munches ocasiones les obres que na cultura popular y nos videxuegos faen referencia a estraterrestres o a OENI acaben asitiándose y ambientándose nes dómines de la Guerra Fría más “típiques”. Asina, podemos ver que la saga Fallout, que fai referencia en delles ocasiones a naves espaciales, tien una estética y una ambientación cincuenteres. Casu tamién de Destroy All Humans 2 (un remake del primeru) que ta ambientáu nos mui icónicos años 50.
¿Y vós? ¿Cuál ye’l vuesu videoxuegu, novela o película favorita sobre los OENI y los estraterrestres?
