La editorial asturiana Ediciones Radagast ta acabante de convocar el so I Premiu Ediciones Radagast de Ciencia Ficción, Fantasía y Terror. La editorial, qu’asoleyó va pocol primer xuegu de rol n’asturianu “Depués d’Ochobre” fixo pública la convocatoria’l vienres 2 d’Ochobre, coincidiendo col “Día de les Lletres”.
El Premiu premiará a una novela de lo que se denomina “ficción especulativa”, esto ye, los xéneros lliterarios nos que la imaxinación y la fantasía son mayores: La Ciencia ficción, la fantasía, la ucronía, lo apocalíptico y el terror. Les noveles habrán tener ente 15.000 y 50.000 pallabres y unviase primero de que remate’l plazu, el 1u de Marzu del añu que vien. Esta primer edición va tar empobinada a creadores de menos de 35 años que son un grupu bastante ausente nes lletres asturianes.
El Premiu va consistir en 300 euros en metálico y n’espublizar la obra. Amás, la editorial nun descarta face-yos llegar propuestes lliteraries a los y les finalistes. El Premiu Radagast conviértese asina nel únicu premiu de novela n’asturianu, xunto col Xosefa Xovellanos de la Conseyería de Cultura del Principáu, y, tamién, nel únicu premiu d’iniciativa privada de les lletres asturianes qu’esiste anguaño, depués de la desapaición del Premiu Trabe.
El xuráu va tar compuestu por escritores y traductores lliterarios designaos pola editorial. Les bases del premiu pueden consultase equí.
