Ye persabío qu’equí préstanos pola vida falar de videoxuegos, y que namái qu’alcontramos dalgún prestosu falamos d’él. Güei nun vamos falar d’un xuegu individual: vamos falar d’un sistema onde pues atopar xuegos pa prebar, fechos polos propios usuarios, y amás de baldre.
CORE ye un videoxuegu, qu’al empar, pa que lo entendáis, ta enllenu d’una montonera de xuegos. Esti xuegu tien un sistema integráu pa facer los tos propios videoxuegos, y pues atopar lliteralmente de too. Foi desarrolláu por Manticore Games y podéis atopala pa descargar n’Epic Games (que de xuru que vos suena por ser los creadores del Fortnite).
Esti videoxuegu asoleyóse n’abril d’esti añu, y tolos xuegos que tán nél tán fechos cola teunoloxía d’Unreal Engine (el motor de xuegos creáu pola compañía Epic Games, too queda en casa). Ta disponible pa Microsoft Windows.
Dientro del propiu xuegu tamién hai concursos colos que pues algamar dellos premios dependiendo del tipu de xuegu y con unos requisitos. D’esta forma, fomenten l’esfuerzu de los usuarios y ye una oportunidá pa dar visibilidá a les creaciones.
¿Qué vamos atopar d’entamu?
Cuando entamamos el xuegu per primer vez, vamos tener que nos rexistrar con un nomatu y yá vamos entrar direutamente al escenariu principal, que ye una especie d’estadiu onde hai puertes dimensionales a los distintos universos, que son caún de los xuegos fechos polos usuarios. Dientro d’esi estadiu hai tres partes: los más xugaos, los que tán acabantes de compartir y los que nos que más tiempu pasa la xente. Sicasí, nun vos esmolezáis, podéis xugar a tolos xuegos, y podéis buscalos hasta pol títulu.
El xuegu tien la posibilidá d’agregar collacios y tamién se puen unviar mensaxes direutos y hai chat de voz. Amás, tamién se puen facer equipos (dalgunos de los xuegos tienen mou cooperativu). Al empar que vas xugando y coles misiones diaries, vas ganando puntos, que pues cambiar por recompenses como ropa distinto o accesorios.
¿Qué xuegos hai?
Los xuegos qu’hai son incontables, y amás son de tou tipu de xéneros y formatos, y puen tar basaos n’obres reales o daqué que ya esiste o ser orixinales. Por exemplu, ye bastante normal atopar videoxuegos que tenten de basase n’animes, como ye’l de Titan Attack, basáu na serie Shingeki no Kyojin, nel que tienes que te xunir a los escuadrones y esplorar y lluchar contra los titanes. Esti xuegu foi creáu pol usuariu Eskil, que tamién creo un xuegu venceyáu a My Hero Academia.
Otru tipu de xuegos bastante común ye’l de temática de supervivencia: zombis, ataques nucleares,…por camentavos que prebéis dalgunos, tenéis el Island Survival Alpha, nel que tenéis que construyir dende cero un campamentu colos materiales qu’atopáis na islla al empar que matáis y sobrevivís a los zombis; Undead Defense Tycoon, nel que tienes que matar zombis pa que te dean perres y poder dir construyendo una fortaleza; y pa finar, el Chernobyl Warzone, nel que tienes que escondete y dir matando al restu de xugadores fasta ser el ganador (y sobrevivir a la radiación).
Aparte d’estos xuegos, tamién podéis alcontrar otros xuegos, como’l Freeze Tag, un xuegu per equipos nel que vas con unes escopetes, metralletes, pistoles,…que llancen boles de xeláu. Tamién tenéis xuegos de superhéroes, d’estratexa, duelos, minigolfs,…ye una fonte inacabable de xuegos, nun ye posible aburrise.
El xuegu tamién dispón d’una tienda de pagu, na que pues mercar créditos que te faciliten les partíes nos distintos xuegos, amás de tresportes y ropa. La ropa siempre va cambiando y van añadiendo ropa nuevo (lo cabero que punxeron foi ropa personalizada cola bandera de venti países, ente ellos España).
Poco más queda por cuntar sobre esti xuegu. Pa descargalu, necesitáis instalar primero l’aplicación d’Epic Games (nun tenéis que pagar), y cuando la tengáis buscar dientro Core y descargáislu. Esperamos que vos preste y si vos animáis, siempre podéis investigar un poquitín d’Unreal Engine (faen falta videoxuegos n’asturianu).
