La empresa productora de los moñequinos más famosos del sieglu XXI nun pasa pel meyor momentu. Y ye que, masque les ventes en 2022 superaron les de 2021 nun venti nueve por cientu (¡algamando los mil trescientos millones de dólares!) resulta que los ingresos netos cayeron más d’un cien por cien. Argumenten qu’estos problemes son a causa d’una combinación de fautores macroeconómicos y problemes específicos de la empresa, y hai quien apunta a qu’ún d’estos problemes que menten ye l’escesu de franquicies de les que la compaña ta sacando figures. Esto provocaría una saturación del mercáu, y taríen pagándolo los moñecos de les menos populares.
Ye por ello qu’anuncien una serie de midíes tremendes, ente les que s’alcuentra un recorte de plantiya d’un diez por cientu, amás de la destrucción d’ente trenta y trenta y seis millones de dólares en moñecos pola mor del costu que-yos produz tener almacenáu un escesu d’inventariu. El presidente, Brian Mariotti, dixo yá va un par de meses que taben “nun puntu d’inflexón”, conque too pinta a que van empobinar la empresa n’otres direiciones.
Los funko pop, la llinia de les figures más famoses de Funko, ficiéronse abondo populares dende la presentación na San Diego Comic Con d’una coleición con personaxes de DC, y dende entós tien incluyío en catálogu otres munches, como de Marvel, Harry Potter, Star Wars, Stranger Things, videoxuegos, anime, películes clásiques, estrelles del rock o del deporte y cuasi toles demás que se puean imaxinar. Tamién se dedica a la producción de figures d’otros estilos, taces y camisetes.
