De mano y p’aclariar les coordenaes dende les que se fai la crítica, he dicir que Sandman nun me pilló n’edá de lleelo según salía, y de fechu nun ye hasta apocayá que me dio por faceme cola coleición. Nun ye que nun me tuviera interesao, pero nun foi hasta 2020 qu’escomenzaron a espublizar una edición de bolsu, afayadiza pa los que tenemos más cómics por comprar que dineru pa gastar. Asina, tengo lleío los cómics nos que se basa la serie, pero ensin el componente de señardá de quien los lleó nel so momentu.
Otru avisu qu’he dar ye que les opiniones tan polarizaes qu’últimamente se dan nes redes siempre me producen rocea, conque yá me punxi a la defensiva cuando alcontré que, como yá ye lo normal, había dos posiciones mui marcaes y a les que había quien s’adscribía de cabeza más que reconociera que tovía nun viera la serie, pero yá teniendo claro cuálu diba ser el so veredictu en viéndola. Per un llau tán los de que ye una adautación magnífica, y que si nun tas d’alcuerdu ye porque nun tienes nin idea, pos el mesmísimu Neil Gaiman ta detrás de l’adautación… como si, amás d’infalible, el cómic lu ficiera él solu, y los dibuxantes nun tuvieren aportao nada y respondieren a too “sí, bwana”. De fechu, ye reseñable al respeutive que’l primer dibuxante, Sam Kieth, marchó a los pocos númberos por nun sentise a gustu nel equipu.
Per otru llau, tán los troglodites acabantes de salir de la cueva quexándose de lo woke que ye too; los que nun lleeron los cómics pola cantidá de personaxes homo y bisexuales, y los que sí pola cantidá de personaxes que na adautación vuelven negros y/o muyeres. D’esta custión namás que me rincha abondo’l cambéu n’Unity Kincaid, pos encalcuza nel Londres de principios del sieglu XX una enigmática familia millonaria d’orixe africanu y apellíu escocés. Tamién rescampla nesti aspeutu que Netflix nun ye tan inclusiva col sobrepesu, porque los gordos cuasi desapaecen del mapa, y qu’al convertir a John Constantine en Johanna (paez ser que por tema de drechos) vuélvenla non fumadora, enforma menos calavera y muncho más llimpina, paeciendo que sal d’un catálogu de Mango (¿prexuicios machistes?). Bono, pero perdonái, que me pierdo nos preliminares. A lo que diba: La serie tien, pa mio idea, dos problemes bien gordos, y que nun tienen nada que ver con estes dos posiciones.
El primeru, vergoña de venir d’un cómic de DC. Ser de Neil Gaiman va xuncío a ciertu prestixu intelectual, y da-y a la serie un aire a American Gods o Good Omens refuércialu. Asómame una sorrisina cuando pienso que ciertes persones puen acercase al cómic con esta idea na cabeza y imaxino les sos cares al atopar un cómic atestáu de personaxes en mayes y dafechu somorguiáu na mitoloxía superheroica de la editorial. Porque Gaiman nun creó a Constantine, nin a esta versión de Caín y Abel, nin a les Trés Bruxes, nin a John Dee (aka Doctor Destiny), nin a Lyta y Hector Hall (aka Fury y Silver Scarab). Porque’l siquiátricu tan raru nel que ta Dee y que paez fechu solo pa él ye en verdá l’Asilu Arkham de Gotham City, y el so rubín ta guardáu nun almacén de la Lliga la Xusticia. De fechu, el mesmu nome’l protagonista, “Sandman”, tuviérenlu yá dos superhéroes, y ye tradición na editorial reciclar los personaxes menos populares con otros dafechu nuevos pero que caltienen el nome (como yá fora’l casu de Green Lantern, Flash, Hawkman o Atom). Y anque dalgún de los cambeos ta solucionáu de manera resultona, otros dexen personaxes qu’acaben por nun pintar na historia o furacos nel guión difíciles d’esplicar. Pienso qu’esta vergoña, no fondero, ye la razón pola que los Inacabables y en cierta manera hasta Lucifer resulten tan vulgares. Y ye que nos cómics tienen un aspeutu que resulta únicu y orixinal, a mediu camín ente dioses olímpicos y estrelles gótiques y glam. L’actor protagonista comentó nuna entrevista que probaron a ser más fieles na estética de Suañu, pero que lo dexaron pa prau porque resultaba “ridículo”. Claro, cuando rebaxes tolo demás eso queda disonante. Conque hemos conformanos con unos dioses qu’en too tienen traces de paisanetos vulgares, y con Suañu nun van acullá de presentánoslu paliducu y murniu, siempre empapiellando, lo que namás que tendría xustificación estilística si siguiera de moda lo emo. L’otru gran error, pa mio idea, ye mete-y el filtru Netflix pa dar un bon resultáu nos algoritmos, y que tresforma un cómic brillante, que pasó a la historia, en namás qu’una serie ramplona que sí, que pue entretener, pero que nunos años nun va recordar naide. Per un llau pierde toa esperimentalidá: por casu, cuando viaxamos a la Tierra los Suaños nel cómic les viñetes tórnense corves, vertixinoses, lo qu’en televisión pide una cámara que se mueva d’un llau a otru; nel mundu de Deséu tenemos un escesu bárbaru de viñetes con una paleta de colores bien restrinxida, lo que pide un tratamientu de videoclip; na escena cuando presenten a Ken y Barbie faenlo nuna serie de viñetes idéntiques nes que caltienen la sorrisa, como xelaos, faciendo que nel intre te provoquen perceguera. Esta riestra de recursos nun tienen análogu na serie, colo que se pierde tola fuercia narrativa en favor d’una dixestión llixera. A ello amiéstase, pienso que pola mesma razón, la mala adautación del narrador omnisciente, colos personaxes contando en voz alto coses que nun vienen a cuentu pa que l’espectador s’entere de les sos intenciones. Tamién, nesti sentíu, ta’l tratu que dan a El Corintiu, la velea personificada con boques en cuenta de güeyos, usando con él lo que llamo’l recursu “¿tienes baillao col Diañu a la lluz de la lluna?” (esto ye, querer coneutar too como na Batman de Tim Burton, na que l’asesín del pá y la ma de Bruce resulta ser el Joker). ¿Daveres fai falta qu’El Corintiu tea ehí dende’l principiu, pa esplicar a un ocultista que rivaliza con Aleister Crowley quién ye’l puntu que tien enzarráu nel suétanu? Y ye queta per toles partes, empobinando toles trames cuando nun ye necesaria la so presencia, anque seya p’apaecer, dar un abrigu a quien tien fríu y volver a marchar. Que la primer escena na que sal seya suplicando, y que coles gafes eses recuerde al malu de Roger Rabbit, nun ayuda nada a da-y la presencia espantible que tien nos cómics; nos que, por ciertu, al principiu namás que sal faciendo barbaridaes que vemos en primer persona… Un recursu sacáu direutamente del cine y que la serie tampoco nun aprovecha. Y ye qu’equí tenemos otru defeutu más producíu pol filtru Netflix, que ye cómo asuavez l’horror, el gore y el gamberrismu qu’hai nos cómics. Por poner dellos casos, Suañu véngase de manera menos terrible cuando, pa detrás, na serie matáron-y al cuervu, Dee regala la cigua a la paisana que lu lleva en coche en cuenta de cargásela, El Corintiu nun tien gustu polos rapazos, los demoños nun van con látex y llencería, pásase penriba de que la ex-moza de Johanna surniaba’l sable, o de que Deséu forció a Unity, y calquen nos motivos de los malos pa que quede claro que tol mundu tien una xustificación pa facer lo que fai. El mundu ye más guapu, menos cruel… y más aburríu pa una serie de temática sobrenatural.
He dicir, a favor de la serie, que l’episodiu quintu ta bastante meyor lleváu que nos cómics, y el sestu ta cuasi al nivel porque, pelo menos nel guión, ye cuasi un calcu de lo qu’adauta. Y val, igual ye una crítica demasiao repunante, ye verdá. Pero bono, un día fágola del cómic, que de xuru va ser meyor.
