Si nos parllamentos cellébrense los debates sobre la situación del país, el que ye ya tradicionalmente conocíu como alderique sobre “l’estáu de l’autonomía”, dalgo asemeyao asocede cola música asturiana. Como tolos años nestes feches, sal l’Anuariu de la música faciendo esbilla y dando parte de tolo que pasó l’añu anterior.
L’anuariu de la música asturiana, coordináu pol productor y cantante de Dixebra Xune Elipe ta acabante salir con más de 150 páxines sobre la situación de la música nel nuesu país y na nuesa llingua. Con una portada dedicada al grupu “Muyeres” al que-y dedica l’anuariu una entrevista más posada nel interior de Damián Barreiro que xira alredor del discu “Humanes”, ún de los trabayos más innovadores de la música asturiana del añu pasáu.
L’Anuariu, que s’asoleya a primeros del presente 2021, asoleyóse per primer vez en 2000 y d’entós p’acá vien faciendo un repasu de la situación de la música asturiana.
Amás d’análisis y entrevistes, nel anuariu vemos testos de divulgación musicolóxica como “El cantar de los siete infantes de Salas (Castiella) y la lleenda de Soutu los Infantes (Asturies)” a cargu d’Alberto Álvarez de la Fundación Belenos. O “Los mayestros torner y benedito de la xirandiya d’Avilés” de Juan Alfonso Fernández García, el direutor del Muséu de la Gaita o de calter más antropolóxicu sociolóxicu como “Les identidaes musicales como iconu” d’Ignaciu Llope.
Entrevistes, trabayos de fondu y análisis completen el volume
Completen un trabayu tan estensu otros artículos d’opinión d’e Xune Elipe, Damián Barreiro, Xicu Ariza, una entrevista aLisardo Lombardía, direutor del festival intercélticu de Lorient, en Bretaña. Amás de reportaxes sobre Rodrigo Cuevas, los Drag Queens na música asturiana, una entrevista a Fruela 757.
Otra manera, un trabayu de lo más interesante ye la radiografía del consumu dixital de la música asturiana, a cargu del periodista Xicu Ariza.
A lo último, l’anuariu recueye como ye tradicional, un llistáu de tolos discos de música asturiana que se fixeron n’Asturies nel últimu añu, un añu que tuvo marcáu, como non, pol andanciu del coronavirus que contabiliza 25 títulos.
L’anuariu de la música asturiana pue descargase de baldre calcando equí.
