Acabante d’entamar ún de los primeros toques de queda dende la muerte de Franco, lo cierto ye que la espresión toque de queda nun ye estraña; sinón que ye d’usu común ente la población. Pero… ¿D’ú vien esta espresión? ¿Ye igual n’otres llingües?
Lo cierto ye que l’orixe de la espresión del Toque de queda ye relativamente modernu y posterior a la llegada de l’aviación. Al paecer, esta espresión vendría de que, en tiempos de bombardeos, facíase una señal o toque (de corneta, campana o sirena) a tola población pa que quedaren quietos en casa y nun salieren a les cais. Esto facíase a la llegada de la tarde o la nueche, y yera una manera de protexer a la población énte un posible ataque de l’aviación enemiga.
En realidá, el primer toque de queda post-Franco declarólu un militar ensin nengún tipu d’atribución llegal. Trátase del bandu que fixeron lleer los golpistes y más concretamente Jaime Milans del Bosch.
Artículu 6.- Establezse’l Toque de Queda dende les ventiún a les siete hores, pudiendo circular namás dos persones como máximu nesti plazu pela vía pública y durmiendo tolos grupos familiares nos sos respeutivos domicilios.
Bandu golpista del 23 de Febreru de 1981
“Cubrefueu”: Otru orixe medieval
Lo cierto ye qu’anque la denominación de toque de queda seya rellativamente reciente, el conceutu tien yá una edá. D’esti mou, atopamos que mientres que’l portugués, el catalán y el castellán tienen espresiones asemeyaes (toque de recolher, toc de queda y toque de queda) otres llingües como la francesa tienen una espresión bien distinta: Couvre-feu, lliteralmente “cubrefueu”. Espresión que toma l’inglés del francés – como tantes otres – y qu’adauta na pallabra curfew, que nun orixe nun facía tanto referencia al fechu de quedar en casa como al fechu de cubrir los fueos o matar les lluces.
L’orixe d’esti cubrefueu, vendría de la dómina de Guillermo’l Conquistador, que-yos impondría a los anglosaxones allá nel sieglu XI la obligación de tapar tolos fueos pela nueche. Buscábase asina que les poblaciones rebeldes nun fixeren fogueres o incendios pela nueche. Más sero, los propios ingleses emplegaríen esta pallabra de mou oficial pa referise a la obligación de matar les lluces pela nueche. Esto fíxose en 1918 pa consiguir aforrar combustible nuna dómina d’escasez por mor de la guerra. Tamién, na Segunda Guerra Mundial fadríase otra vez lo mesmo anque nesta ocasión más por evitar que l’aviación nazi fore a acolumbrar bien los pueblos y ciudaes británicos.
El toque de queda n’Europa
Anque nel estáu español el toque de queda paeza tovía dalgo raro; lo cierto ye qu’otros estaos democráticos emplegaron esti instrumentu en más d’una ocasión. Ye’l casu de Francia, que nes revueltes de los suburbios parisinos de 2005 acabó decretándolu en ciertes comunes. En feches más recientes, la propia Francia decretaría esti toque de queda na isla de la Reunión.
Anguaño, el toque de queda amás de n’España, ta declaráu en Bélxica, Francia y delles rexones d’Italia.
