Va unos meses facíemonos ecu del mecenalgu pa sacar el primer xuegu de mesa n’asturianu p’adultos: ¿Cuála ye? Trátase d’un xuegu de mesa d’entrugues y respuestes que tien un aspeutu y una dinámica mui asemeyada a la del conocíu Trivial Pursuit.
Nél, los temes tán dixebraos en categoríes distintes como la xeografía, la lliteratura o la historia y los xugadores han dir aldovinando ún tres d’otru hasta algamar l’equivalente a los “quesinos” del Trivial orixinal. Con too, les mecániques sabrémosles claramente cuando’l xuegu apuerte a les tiendes y persones que lu sofitaron. Desgraciadamente, por mor d’un contautu direutu con una persona infeutada de coronavirus, los responsables d’Acuto Xuegos nun van poder entamar la distribución del xuegu hasta últimos d’esti mes.
