Si hai una “prenda” de vistir que ta poniéndose de moda estos díes, esa prenda ye l’embozu. Embozos hailos, como los pantalones, de clases y condiciones bien estremaes; anque nesti artículu vamos falar, sobre too, de los que tienen un usu médicu. Y ye verdá qu’anque pa la mayoría de la población emplegalos ye daqué nuevo, nun pasa lo mesmo en delles profesiones nin en dellos países. Asina, en llugares como China o Xapón, primero del andanciu del coronavirus, yera normal ver xente con embozos pela cai. Tratábase de xente que taba malo, esto ye, poníen l’embozu pa facer qu’otra xente nun se contaxare cola enfermedá que teníen. D’esti mou, minimizábase’l contaxu. Tamién, en China, en munches ocasiones la xente llevaba embozos pa protexese de la contaminación, que nesi país ye ún de los llugares nes que mayor problema tienen.
¿Pero d’ú vien l’emplegu del embozu pa protexese? Munchos pensarán que ye daqué de les guerres mundiales, de cuando la xente ponía embozos pa protexese de los ataques de gas. Y si bien ye verdá qu’esto pasó, l’emplegu del embozu hai que dir a buscalu bien lloñe na historia. Concretamente, l’historiador romanu Pliniu’l Vieyu fálanos yá del emplegu d’embozos nes mines romanes. Los trabayadores de les mines – esclavos munches veces – poníen embozos pa protexese de los materiales y les polvarees que llevantaba, concretamente pa protexese del óxidu de plomu. Daquella los embozos yeren muncho menos “hixénicos” qu’anguaño, pos el material del que taben fechos yera vexiga d’animal.
Nos tiempos de la peste, andanciu del que yá falemos en Refuelgu nel artículu sobre los andancios qu’hebo a lo llargo de la hestoria, foi tamién frecuente ver embozos pa protexese de la enfermedá, anque nun valíen pa nada, porque la peste tresmitíenla les pulgues de les rates y non pel aire. De toes maneres, les mázcares carauterístiques cola nariz allargada son una de les coses más icóniques de los tiempos de la peste.
Los primeros modernos: na dómina de la ilustración
Más alantre, na dómina de la ilustración, el francés Jean-François Pilâtre de Rozier inventaría un embozu más asemeyáu a como lu conocemos anguaño l’añu 1785, y empliaríalu pa investigar nel campu de los gases. Primero del so inventu, los embozos pa poder respirar asemeyábense poco a lo qu’emplegamos anguaño: Tratábase de bolses que cubríen tola cabeza y que teníen furaquinos pa poder ver. Solíen ser de tela o goma. D’esti mou, otros inxenieros y científicos diríen ameyorando l’inventu. Ye ésti’l casu del sabiu prusianu Alexander Humbold, que desendolcaría embozos con válvules pa emplegalos na minería prusiana. John Stenhouse, escocés, inventó otru embozu pa respirar que, como se pue apreciar na imaxe qu’apurrimos, paezse abondo a los qu’emplegamos anguaño.
La particularidá del embozu de Stenhouse ye que ye’l primeru qu’emplega carbón activo, un material que tien la propiedá d’atrapar una bona cantidá de gas, exerciendo como filtru. Una téunica que diben emplegar depués d’él nel desendolcu de les mázcares antigas na primera y segunda guerres mundiales.
La Primer Guerra Mundial: El gran campu de pruebes
La Primer Guerra Mundial foi un confliutu d’especial crueldá que superó, según munchos historiadores, a la tamién cruel Segunda Guerra Mundial. Nella l’emplegu del gas como arma química faise de mou xeneralizáu como un arma de guerra más – arma de guerra que, más alantre, torgaríen bien de convenciones internacionales y trataos pola so crueldá. Na Primer Guerra Mundial emplégase’l gas llacrimóxeno, pente otros tipos de gas venenosos; y anque namás un 3% de les víctims mortales de la Primer Guerra Mundial débense al emplegu d’estes armes, sí xeneraron un mieu y un impautu sicolóxicu fondu.
El cloru y el gas mostaza foron los dos gases principales que s’emplegaron, anque non los únicos. El casu del gas mostaza ye especialmente cruel, porque xenera una muerte por asfixia depués d’una inflamación. Nesta dómina l’emplegu d’embozos pa protexese del gas faise precisu. Equí surden una serie de variables según la etapa de la guerra (La Primer Guerra Mundial, como la segunda, ye una dómina de gran avance científicu) y del tipu de gas al que se quiera resistir. Estos embozos específicamente diseñaos pal gas tienen una durabilidá que va acordies cola capacidá del filtru (xeneralmente de carbón activo); polo que más qu’una serie de díes o meses, depende de la cantidá total de gas qu’entre nelles. Otru tipu de mázcares, ta pensáu pa tar coneutaes a reserves d’osíxenu y nun tienen filtru pos nun empleguen l’aire esterior.
Usu modernu
N’acabando les dos guerres mundiales, l’emplegu de les mázcares de gas desapaez pero siguen siendo precisos los embozos en llugares como hospitales y, tamién, en munches profesiones. Ye por exemplu’l casu de trabayos como los canteros, los restauradores, los químicos, los ciruxanos, los sanitarios qu’han tratar con xente infeccioso… etc. Pa caúna d’estes situaciones y necesidaes específiques surden embozos específicos. D’esti mou hailos reutilizables y non-reutilizables, fechos y pensaos pa nun se contaxar de virus d’otres persones y pensaos pa nun contaxar el nuesu virus a otres persones. Por eso, si vais alquirir un embozu estos díes, aseguráivos de conocer pa qué val y si s’axusta a lo que buscáis.
