El xuegu d’entrugues y respuestes n’asturianu d’Acuto Xuegos “¿Cuála ye?” casi ye yá una realidá. El xuegu consiguó yá recaldar más del 85% de los 4.500 € que pidíen los creadores pa facer posible’l proyeutu. Nestos momentos hai recaldaos más de 3.900 € y yá participaron nel mecenalgu más de 90 persones. Si se consigue aportar al oxetivu – y too paez indicar que sí, a falta de poco más de 500 € – “¿Cuála ye?” convertiráse nel primer xuegu de mesa d’adultos fechu n’asturianu y, neto qu’asocedía colos demás, financiáu de mou priváu y ensin contar con nengún tipu de sofitu o sovención pública.
El xuegu d’entrugues y respuestes cuenta cola ayuda de persones especialistes d’estremaes árees de conocimientu como puen ser, por exemplu, Bertu Ordiales, biólogu y escritor; Bertu Peña, etnógrafu, illustrador y historiador; Dani García de la Cuesta, músicu y investigador de la música asturiana; Laura Marcos, profesora, escritora y crítica lliteraria; Julio González Trabanco, filólogu y llibreru; Rafa R. Valdés, historiador, investigador y especialista en llingua asturiana; Rubén Magadán Cosío, historiador y investigador; Victor Suárez, profesor y activista o SEMA, Sociedá Etnomotora Asturiana, entidá que tien estudiao con fondura’l xuegu y deporte asturianu. Que s’ocuparon de que toles entrugues tuvieren documentaes.
¿Un xuegu didáuticu?
Como asocede colos xuegos d’entrugues y respuestes, “¿Cuála ye?” pue convertise tamién nuna ferramienta esceicional pa deprender más sobre les estremaes estayes nes que s’agrupen les entrugues: Historia, Cultura, Llingua y Lliteratura, Xeografía y Conceyos, Ciencia y Naturaleza y Deportes y Entretenimientu.
El volume del xuegu de mesa nun ye precisamente pequeñu. “¿Cuála ye?” cuenta con 600 preguntes en 100 tarxetes y los sos autores, anque nun llegaron a formalizalo como un “stretch goal” de la campaña, yá dieren anuncia de que queríen poder ampliar el númberu d’entrugues si la campaña de mecenalgu-yos sal bien.
¿Cómo consigulu?
Pel momentu, el xuegu ye namás accesible al traviés de la campaña de micromecenalgu de Verkami nesti enllaz. Queden namás unes poques selmanes pa poder facese con él.
