La respuesta curtia a esta entruga ye “nunca, hai quien sigue faciéndolo”, pero lo cierto ye que cuando ún mira semeyes antigües, suel llama-y l’atención la cantidá de sombreros qu’había per ende: sombreros del oeste, chisteres de “capitalista” del Monopoly, turbantes, velos, pameles, cascos prusianos, panameños, sombreros de paya, monteres picones, barretines y una montonera más de variantes y d’estilos acordies col país, la dómina y la clas social. El casu ye que, col pasar del tiempu, l’usu del sombreru convirtióse nes nueses sociedaes en dalgo minoritario que se dexa namás pa delles ocasiones como pue ser l’usu de los gorros cuando’l tiempu ye verdaderamente fríu o en determinaos contestos o situaciones sociales como les fiestes tradicionales nel usu de los sombreros del traxe del país o na playa.

D’Exiptu a Europa

Los primeros sombreros documentaos atópense n’Exiptu. Nun entamu l’usu de los sombreros tien más que ver cola necesidá que cola moda o la estética. D’esti mou, son los trabayadores del campu exipciu los qu’han ponelos pa face-y frente a la calor tan estrema d’aquella fastera del mundu. Amás, nes clases más riques del antiguu Exiptu, yera vezu rapar la cabeza; polo que l’usu de gorros facíase necesario pa caltener la cabeza abellugada del sol. La primer representación d’un gorru o sombreru exipciu data del añu 3.200 primero de Cristo.

Roma y el gorru frixu

De la dómina romana, na que sí hai una bona riestra de testimonios y documentos, sábese que l’emplegu de los sombreros nun yera tan estensu como lo foi, por casu, nel sieglu XIX européu. Daquella la mayoría de los homes nun llevaba gorru y diba cola cabeza descubierta. D’esti mou apaecen emperadores, soldaos y ciudadanos romanos per toa Europa (y bona parte del Mediterráneu). Con too, l’usu de los sombreros nun-yos yera estrañu. Ye daquella cuando entama a popularizase’l gorru frixu, qu’acabaría siendo más sero un símbolu de llibertá col que solíen pintar a toles alegoríes de les repúbliques decimonóniques. Daquella, na dómina romana, los gorros frixos llevábenlos los esclavos lliberaos, convirtiéndose asina nun símbolu de la so condición de ser humanu emancipáu.

Ye llamadero d’esta dómina que les clases altes nun los emplegaren. Dende llueu, utilizóse siempre’l cascu nes guerres (el so usu taba bien espardíu, pero nun pue considerase un sombreru strictu senso). Tolo más que llevaben los emperadores y xenerales victoriosos yera una corona de lloréu, nada que ver con un verdaderu sombreru.

Edá media: campesinos, cures y sombreros de paya

Na edá media’l sombreru taba ehí, anque yá d’otra manera. Nes clases altes, como pasaba cola dómina romana, nun yera un complementu de moda que s’emplegare muncho. Eso sí, había dellos sombreros que teníen un valor distintitvu de la profesión, el mandu o l’autoridá qu’ún tenía: La ilesia, cada vuelta más organizada a lo llargo de la edá media, foi creando una serie de sombreros bien estremaos que yeren a diferenciar (entá güei) a caún de los miembros del cleru según la so función y posición na pirámide d’autoridá de la ilesia: Obispos, callóndrigos, cures y papes; caún d’ellos tenía’l so sombreru carauterísticu y, los que taben nel cleru regular (les órdenes de monxos y monxes) nun teníen sombreru como tal, pero sí solíen llevar una capucha p’atapar el pelo.

Del usu “civil” pente les clases pudientes, el sombreru nun taba estendíu nin tenía esti valir, sacantes, claro ta, la posición de Rei, al que se lu asociaba yá cola corona que, en cierta midida, ye un tipu de sombreru. Tocante a les clases populares, ye nesta dómina que se desendolca la manera de facer sombreros a base de llinu; y d’esti mou acaben faciéndose sombreros de llinu y de paya pa los campesinos europeos, qu’habíen trabayar al sol y yera menester protexese pos na Edá Media hebo’l so cambiu climáticu.

Jewish hat - Wikipedia
Detalle de los sombreros xudíos obligatorios pa los miembros d’esta relixón pol IV Conciliu de Letrán.

Como datu interesante, hai que solliñar qu’a los xudíos, nuna llarga tradición anti-semita europea, impónse-yos la obligación de llevar el sombreru xudíu tradicional, como consecuendia d’una decisión del IV Conciliu de Letrán. Por desgracia, esta tradición de marcar y señalar a los xudíos siguió n’Europa hasta bien entráu’l sieglu XX.

Renacimientu y sieglu XIX: Camín de la hexemonía

Pintura renacentista: características, cuadros y artistas - Xtrart.es

Los sombreors nun desapaecen nel Renacimientu, anque’l so usu ta lloñe de ser estendíu si se miren les pintures y ilustraciones de la dómina. Dellos gorros de tela esisten y siguien viéndose, pero nun tien un papel tan fundamental como’l que pudo tener más alantre. N’efeuto, ye nel sieglu XIX cuando los sombreros entamen a popularizase pente toles clases sociales. A lo primero, son los sombreros de muyer que van medrando en tamañu poco a poco y tamién más decoraos, davezu con flores fresques. En dellos llugares entamó a afitase la obligación de llevar sombreru como parte d’un “códigu de vestimenta”; como foi’l casu de los hipódromos ingleses, mui apreciaos pola burguesía y bien ceo imitaos pol restu de clases sociales.

La Revolución de 1934 en España
Mineros cola boina, común nes clases trabayadores asturianes a entamos del Sieglu XX..

No que toca a Asturies, el sombreru tradicional, la montera picona, va remplazándose a lo llargo de los sieglos XIX y XX pola boina, más común na dómina revolucionaria asturiana (hai non poques imáxenes del presidente asturianu, Belarmino Tomás, con ella puesta); y foi omnipresente nos mineros asturianos que fixeron la Revolución d’Ochobre.

L’usu del sombreru va allargase tola primera metá del sieglu XX. Los sombreros de copa dan pasu a sombreros panameños o d’ala curtia y a los tan carauterísticos sombreros de los años 40, que lleguen en munches ocasiones a los años 50. Nesa dómina tanto homes como muyeres van dexando de ponelos hasta que, nos años 60, el so usu dexa yá de ser mayoritariu. D’entós p’acá, siguen usándose anque cada vuelta en situaciones más concretes y minoritaries; hasta’l puntu de que, pa bien o pa mal, na dómina actual, emplegar un sombreru fuera de lo que ye un gorru d’hibiernu o un cascu de moto, acabó siendo visto por delles persones como un rasgu d’una cierta escentricidá.

Leave a Reply

La to direición de corréu nun va espublizase. Los campos riquíos márquense con *