república, la:sust. Forma de gobiernu [onde’l poder cimeru nun ye hereditariu y tienlu un representante escoyíu pol pueblu
Diccionariu Académicu de la Llingua Asturiana (DALLA)
La definición qu’apurre’l DALLA ye clara. Pa que falemos d’un sistema de gobiernu republicanu, el poder nun pue ser hereditariu y ha tenelu un representante escoyíu pol pueblu. Sicasí, tien los sos inconvenientes: Acordies cola definición del DALLA, Corea del Norte nun sedría una república – anque s’afite como tal – pos el mandatariu actual ye fíu y nietu de los mandatarios qu’hebo primero. Ye más, dende la so fundación na guerra fría, na República Democrática Popular de Corea namás mandó una familia.
Tamién, hai munches otres repúbliques nes que, nun siendo hereditariu’l poder, el muérganu de poder nun ye escoyíu pol pueblu o, si lo ye, yelo de forma indireuta. Dacuando, estos representantes escuéyelos namás una parte del pueblu, otres veces, trátase d’oligarquíes o xuntes militares que caltienen la forma “Republicana” pero nun hai nellos nenguna intención de puxar pola representatividá. Tamién, n’ocasiones, trátase de rexímenes que permiten una participación dientro d’unos calces mui concretos (dientro d’un partíu únicu, o d’una relixón mayoritaria), sedría ésti’l casu de países como China, Cuba o Irán. Onde la representatividá ta “viciada”. ¿Son o nun son estos países repúbliques? Acordies cola definición de l’ALLA, nun lo sedríen. Por esto, pa una mayor operatividá, vamos quedanos cola primer parte del enunciáu “Forma de gobiernu onde’l poder cimeru nun ye hereditariu”. ¿Qué “Formes de gobiernu onde’l poer cimeru nun ye hereditariu” hebo nel actual territoriu d’Asturies?
L’Asturies prerromana y romana
De la organización política de l’Asturies prerromana conócense poques coses. Por nun conocer, nun se conoz nin la llingua que se falaba sacantes por delles pallabres sueltes o inscripciones -yá en llatín – na dómina de los romanos. Acordies colos testos que mos llegaron y les investigaciones, nun habría un “Estáu” de “Asturia”; sinó que los ástures sedríen pueblos organizaos llocalmente onde se federaríen pa dir a la guerra escontra l’invasor común y onde nun ye descartable qu’hubiere confliutos y guerres ente ellos. Ye difícil establecer si esos grupos s’organizaben de mou hereditariu o non cola información que se tien – que ye siempre de segunda mano y con daqué de propaganda de la so causa, per parte de los romanos.
La llegada tardía de los romanos fai qu’astures y cántabros nun puedan vivir embaxo un réxime republicanu. D’esti mou, si bien ye la República de Roma la qu’entama la guerra escontra ástures y cántabros; nel momentu en que la guerra acaba yá entama l’imperiu romanu. Bien ye cierto que nel Imperiu Romanu sobreviven munches instituciones y lleis de la República de Roma; pero l’alcuerdu ente los historiadores ye nun lo considerar una institución republicana.
¿Monarquía eleutiva o república?
Depués de la dómina romana, vienen les invasiones de los pueblos xermánicos como los visigodos o los suevos. Nin el reinu Suevu al que perteneció Asturies dientro de la provincia romana de Galaecia, nin el Reinu Visigodu al que perteneció depués esti territoriu afitaron una monarquía estable. De fechu, los cambeos de poder, según lo que diz la historia, teníen más que ver colos capítulos de Xuegu de Tronos que con unes pautes precises nun sen monárquicu (hereditaroiu) o republicanu (monarquía eleutiva). Según les cróniques medievales, Pelayu nun sedría Rei de los ÁStures sinón “Princeps”; un títulu que yá esistía nel Senáu Romanu y qu’indicaba un “primum inter pares”. Tres d’él, hebo otros reis que, anque sí tuvieron esti títulu, foron escoyíos; polo que podría plantegase si yera una monarquía (l’estáu de los ástures tenía rei); o si, per contra, yera una república (los reis yeren eleutivos).
De toes maneres, a midida que foi avanzando la Edá Media, esta monarquía acabó siendo una monarquía “Clásica” y pa mediaos del sieglu IX, tábase yá dientro d’una monarquía hereditaria que diba siguir asina depués de que la capital del reinu se moviere d’Uviéu a Llión. Asina, y anque Alfonso IX convocare les primeres cortes na ciudá de Llión en 1188 – lo que ta reconocío pola UNESCO como’l primer parllamentu medieval continental – nun tamos énte una República. El xefe del estáu y del gobiernu siguía siendo’l Rei y, anque los sos poderes taben llimitaos por esta llexislatura compuesta por clérigos, nobles y xente común; siguía siendo él el que gobernaba.
Nada hasta’l sieglu XIX
Depués de l’anexón del Reinu de Llión a la Corona de Castiella en 1230 nun hai nengún momentu o períodu republicanu na hestoria d’Asturies. La Corona de Castiella primero y l’Estáu Español depués que surde en 1812 tienen en común el tener siempre, con un mayor o menor grau de llibertaes civiles, el fechu de ser siempre sistemes monárquicos. Anque tamién heba vacíos de poder y rexencies, nun se pue falar stricto sensu d’un períodu republicanu. Por eso, la primer ocasión na qu’Asturies hai república ye – si nun se tien en cuenta la monarquía eleutiva astur – cola llegada de la I República Española; que va durar del 11 de febreru de 1873, hasta’l 29 d’avientu de 1874. Esto ye, poco menos de dos años. Pola duración curtia nun hai ocasión d’aplicar la constitución federal que reconocía a Asturies como ún de los Estaos Federaos.
D’esta dómina ye’l Proyeutu de la Constitución del Estáu Federáu Asturianu, que podeis consiguir equí. Y que recoyía les bases del gobiernu del estáu asturianu pa esta república federal que nun llegó a ser, según les establecieron los miembros del Partíu Federal.
1931: La segunda República Española
En 1931 Asturies, como tolos países que formen parte d’España, pasa a tar nun réxime republicanu. El 14 d’abril proclámase la República y les banderes tricolores reemplacen a les bicolores. Nesi mesmu añu, apruébase tamién la Constitución de 1931 que reconoz a Asturies la capacidá d’algamar l’autonomía. Distánciase asina de la constitución del sieglu XIX “volviendo p’atrás” y nun permitiendo más qu’esto como una opción, qu’anque dellos políticos y personalidaes estudien, nun llega cuayar na curtia vida de la Segunda República Española. Esti réxime democráticu, nel que’l partíu filofascista CEDA gana les eleiciones del 19 de payares de 1933; va dexar n’Asturies pasu a otru réxime republicanu, anque nesti casu de calter obreru.
La Constitución de la 2ª República Española establez un réxime de llibertaes y afita una serie de derechos poniendo les bases pa un estáu muncho más social de lo qu’hubiere nunca n’España hasta’l momentu. Sicasí, la llegada a les instituciones de les fuercies de dereches, acaba con munchísimes d’eses reformes y mete mieu a la población sobre la posibilidá
La República Obrera y Campesina d’Asturies na revolución asturiana
D’esti mou, nuna dómina na que los nazis llegaren al poder un añu atrás tamién pela vía democrática (La coalición ente Hindenburg y el NSDAP nun yera mui estremada de la que teníen Lerroux y la CEDA), españa n’Asturies la Revolución Asturiana y con ella surde un nuevu poder republicanu. Nes dos selmanes que dura’l llevantamientu popular y obreru asturianu, el Comité Revolucionariu exerce como un gobiernu de coalición del nuevu estáu mineru y obreru.
Esti Comité entra en delles crisis y hai, hasta’l fin de la guerra ente la moza República Obrera y Campesina de Asturias y la Segunda República Española un total de trés comités revolucionarios, de los que l’últimu va tar presidíu por una figura clave pa entender la última república asturiana: Belarmino Tomás; un llider sindicalista y militante del PSOE. La República Obrera y Campesina d’Asturies nun tien tiempu de, como ye llóxico, afitar nenguna constitución o marcu llegal. Sí lo tien, de controlar la producción, el mercáu y, cómo non, la guerra. Anque too acaba’l 19 d’ochobre cola rendición del III Comité Revolucionariu al exércitu regular español. Volvía asina Asturies (o una bona parte d’ella, porque otra parte nun la abandonare nunca) a tar embaxo’l réxime republicanu del 14 d’Abril.
La última república asturiana: La república asturllionesa
Pero’l 5 d’Ochobre nun diba ser la última vez en qu’Asturies diba romper col réxime del 14 d’abril. El 24 d’agostu de 1937, énte l’abandonu d’Asturies – aisllada resistiendo al fascismu – nel frente Norte, el Conseyu Interprovincial d’Asturies y Llión garra’l determín de declarase “Conseyu Soberanu d’Asturies y Llión“. Esta proclamación faise
“Artículu 1u.– El Conseyu d’Asturies y Lleón, dende la fecha y hora d’esti Decretu, constitúise en Conseyu Soberanu de gobiernu de tol territoriu de la so xurisdicción, y a elli queden dafechamente sometíes toles xurisdicciones y organismos civiles y militares que funcionen y funcionaren no socesivo dientro del territoriu referíu.
Artículu 2u.– El propiu Conseyu Soberanu, a la vista los acontecimientos favoratibles que se produzan nel trescursu de la guerra, determinará’l momentu de dexar les sos funciones soberanes que güei asume.
Artículu 3u.– D’esti Decretu daráse cuenta al gobiernu la República pa la so convalidación; ensin perxuiciu de la so absoluta vixencia, impuesta pol imperiu les circunstancies, dende esti mesmu momentu de la so promulgación.
Dau en Xixón, a venticuatro hores del día venticuatro d’agostu de mil novecientos treinta y siete.”
Decretu de la Declaración Unilateral de Soberanía
Duraría esta república asturllionesa dende’l 24 d’agostu de 1937 hasta’l 21 d’ochobre de 1937, una totalidá de cuasi dos meses que ye cuatro veces más de la duración de la ROCA. Nesti tiempu, el Conseyu Sobernau d’Asturies y Llión faise col control de la vida política, social, económica y militar. Produz asina moneda propio – énte la falta de recursos – los conocíos “Belarminos”.
Amás, el gobiernu del Conseyu Soberanu d’Asturies y Llión non solo emite moneda, sinón tamién sellos y controla’l restu de departamentos; estableciendo una serie de ministerios que van ocupase de les estremaes arees polítiques. Llama l’atención que’l presidente, Belarmino Tomás, que ya fore’l presidente del III Comité de la ROCA, ye’l que remana los asuntos militares por tener non solo la presidencia sinón tamién la cartera de Guerra.
Güei, 14 d’abril, munchos asturianos y asturianes reivindicaríen la república. ¿Cuál de toes elles? Probablemente toos taríen d’alcuerdu: La que ta pa llegar. La historia escríbese cada día.
