Va unos pocos díes Inaciu Galán y González presentaba la so tésis doctoral, premiada con un sobresaliente cum laude. “La llingua asturiana nel Franquismu”. Un tema sobre’l que Refuelgu va preguntá-y próximamente. Sicasí, a la hora de falar de tésis n’asturianu, surden entrugues sobre l’estáu de la normalización del nuesu idioma. ¿Cuántes tésis n’asturianu se lleeron hasta’l momentu? ¿Son munches, son poques?
Por recentrar los datos, hai que dicir que la situción del asturianu na universidá d’Asturies ye de práuticamente persecución hasta feches bien recientes. Hasta va poco, el propiu reglamentu de la Universidá torgaba la presentación de tésis n’asturianu. Anque anguaño seya posible, hai bien de torgues alministratives o polítiques que se-yos ponen a les persones que quieran asoleyar la tésis n’asturianu como denunciaba en feches recientes el propiu Inaciu Galán, coles esixencies de tornar al castellán la so tésis o partes d’ella.
El 50% de les tésis n’asturianu defendiéronse nos últimos 3 años
N’Asturies algamen el másimu grau académicu (Doctor/a) más de 300 persones cada añu. D’esti mou, na Universidá d’Uviéu lleense más de 3 centenes de tésis en toles disciplines que s’imparten nella: Dende la filoloxía hasta la química pasando pela física, les matemátiques o les ciencies económiques.
Sicasí, lo cierto ye que la presencia de les tésis n’asturianu ye escosa, anque presente dende va décades. Esta ye la llista de tésis que Refuelgu foi p’atopar coles tesis que se lleeron n’asturianu na Universidá d’Uviéu o n’otres universidaes.
- 1988: Aspeutos sociollingüísticos de la parroquia xixonesa (Deva), Ramón d’Andrés.
- 2007: La fala de Trubia (Asturies): estudiu sincrónicu y diacrónicu, onomástica y aspectos sociollingüísticos. Pablo Suárez García.
- 2011: Papel de los escritores del Surdimientu na recuperación del asturianu: la visión del escritor. Xuan Santori Vázquez.
- 2016: Bases pa un Corpus de teatru n’Asturies. Antón Caamaño. (Na Universidá de Vigo).
- 2018: L’allugamientu del dialeutu senabrés dientro del dominio ástur. Estudiu descriptivu de la fala senabresa. Xuan Xosé Lajo Martínez.
- 2019 Estudios diacrónicos del paisaxe y el poblamientu nel noroeste ibéricu: el territoriu d’Ayande (sieglos I-XIII). Andrés Menéndez Blanco.
- 2020: La llingua asturiana nel Franquismu. Inaciu Galán.
- 2020 (pendiente de defensa): El sistema de denominación de los neños abandonaos n’Asturies. Claudia Elena Menéndez.
Llamen l’atención delles coses. De mano, el fechu de que nos últimos 3 años, de 2018 a 2020, lleéronse o van lleese tantes tesis doctorales (4) como les que se lleeron en toles décades anteriores. Tamién, el fechu de que per primer vez, tán apaeciendo tésis n’asturianu n’otros dominios estremaos de la lliteratura y la llingüística, como ye por casu la tésis d’Andrés Menéndez Blanco, encuadrada na xeografía. Vemos que tovía hai bien de torgues a la presentación de tésis n’asturianu (La primer torga de toes, ye un sistema educativu qu’alfabetiza de manera mui probetaya n’asturianu); pero que poco a poco’l númberu va medrando.
¿Escaecimos dalguna tésis? Contáutanos en redaicion@refuelgu.com pa que la tengamos en cuenta.
