Esti añu Pokemon dexó atrás, tres nada menos que venticinco temporaes como protagonista, al míticu entrenador de bichinos Ash Ketchum. Y con ello dio’l protagonismu en Pokemon Horizons, la serie nueva, a héroes tamién nuevos… Unos que resulta que percuerren Paldea, el país que nel Universu Pokemon s’alluga nel llugar d’España. Vese nel mapa, que recuerda al de la Península Ibérica, nel paisaxe, na arquitectura, y hasta nun pokemon aceituna qu’evoluciona a olivar, o otru que ye un mirasol. Ye llamadero que, por casu, na zona correspondiente a Asturies allúgase un pokemon basáu nel oriciu.
El casu ye que Pokemon: Horizons, que nun sabemos por qué tovía nun-yos dio por sacala n’España cuando yá lleva meses estrenada en Xapón, promete, arriendes d’esta, un montonáu más de novedaes. Podemos empezar polos sos protagonistes: Una ñeña, Liko, que tien de collaciu un nyahoja (sprigatito n’inglés), ye dicir, un gatu-planta, y Rod, un rapaz con un hogator (fuecoco n’inglés), un cocodrilín-pimientu del piquillu. Eso sí, pa señardosos, tamién anden pehí los monstruínos clásicos, ente los que, claro, alcuéntrase un pikachu… con un tal Capitán Pikachu d’entrenador.
Y too esto vien a que, agora, l’agraviu pa contra nós aumenta. Y ye qu’en Xapón la serie avanza esitosa, tanto que yá cambia d’etapa y la nueva vien hasta con una abertura nueva que promete más épica tovía. Dexámosvosla calcando equí, por si queréis sufrir un poco…
Oi, y agora que tenemos d’escribir esti artículu viennos la cosa… ¿nun pensáis que necesitamos una traducción de los nomes de tolos pokemones n’asturianu?
